وەزیری کارەبا: چوار ملیۆن هاووڵاتی هەرێمی کوردستان کارەبای 24 کاتژمێریان هەیە

ئاڤا نیوز

وەزیری کارەبای حکومەتی هەرێمی کوردستان دەڵێت ئێستا نیوەی دانیشتووانی هەرێمی کوردستان کارەبای 24 کاتژمێریان هەیە کە ژمارەیان دەگاتە چوار ملیۆن کەس.

 

وێنە گەورەکە: پڕۆژەی ڕووناکی پڕۆژەیەکی ستراتیژیی حکومەتی هەرێمی کوردستانە کە لە کابینەی نۆیەم بڕیاری لەسەر درا و کەوتە بواری جێبەجێکردنەوە، بەگوێرەی ئەو پلانەی دانراوە تا کۆتایی ساڵی 2026 کارەبای سەرجەم ماڵ و شوێنە بازرگانییەکان دەبێتە 24 کاتژمێری بە تێچووی کەمتر و لە ژینگەیەکی پاکتر.

 

لێدوانی فەرمی: کەمال محەممەد، وەزیری کارەبای حکومەتی هەرێمی کوردستان دەڵێت، "چوار ملیۆن هاووڵاتی، زیاتر لە (50%)ی هاووڵاتییان لە سەرانسەری هەرێمی كوردستان و زیاتر لە 115 هەزار شوێنی بازرگانی، لە ڕێی ئەم پڕۆژەی ڕووناکییەوە كارەبایەكی 24 كاتژمێرییان هەیە."

 

ئەمەش بزانە: یەکێک لە ئامانجە سەرەکییەکانی پڕۆژەی ڕووناکی کەم کردنەوەی دووکەڵی پیس و گازی ژەهراوییە لە هەوا، بۆ ئەو مەبەستەش تاوەکوو ئێستا سێ هەزار و 222 مۆلیدەی گەڕەکەکان کووژێنراونەتەوە، کە سوودی بۆ تەندروستی و سەلامەتیی هاووڵاتیان هەیە.

 

خاڵی ئەرێنی: ئێستا لە 80%ـی هاوبەشان پارەیەكی كەمتر لە جاران بەو كارەبایە دەدەن كە پێشتر بە مۆلیدەكانیان داوە.