گرووپی "هەورامیانە" بەرهەمێکی نوێ لەگەڵ جووتیارێکی تەمەن 70 ساڵ تۆمار دەکەن

ئاڤا نیوز

 

گرووپی مۆسیقای فۆلکلۆری "هەورامیانە" کە تایبەتن بە تۆمارکردنی دەنگە ڕەسەن و بێناونیشانەکانی هەورامان، نوێترین بەرهەمیان لە گوندی سلێن تۆمار کرد. ئەمجارە ئەوان لەگەڵ "لالۆ حەمە"ی تەمەن 70 ساڵ، جووتیار و باخدارێکی دانیشتووی گوندی سلێن، کلیپێکی گۆرانییان تۆمار کرد.

چیرۆکی سەرەکی: گرووپەکە دوای ئەوەی لە دەنگخۆشی لالۆ حەمە ئاگادار دەبن، سەردانی دەکەن و لەنێو باخە گوێزەکانی گوندی سلێن، کە تازە لالۆ حەمە گوێزەکانی تەکاند بوو، چەند ڕاهێنانێکی مۆسیقای لەگەڵدا دەکەن. لالۆ حەمە، کە بە جلی کوردی (کوڵەباڵ و دەسماڵ) دەرکەوتووە، لەگەڵ گرووپی هەورامیانەدا گۆرانی "غەریب مەڕۆ غەریب گیان" تۆمار دەکات.

لێدوانی فەرمی: فازڵ نیکڕەفتار، بەڕێوەبەری گرووپی هەورامیانە بە ئاڤا میدیای ڕاگەیاند، گرووپەکەیان بەتایبەتی لەسەر گۆرانی و مۆسیقای هەورامی کار دەکەن و گوند بە گوندی ناوچەکە دەگەڕێن. ئامانجیان دۆزینەوەی پیاو و ژنانی دەنگخۆشە و بە خۆبەخشیش هەوڵ بۆ تۆمارکردنی فۆلکلۆر و گۆرانییە ڕەسەنەکانی هەورامان دەدەن.

 

ئەوەی پێویستە بیزانیت: گرووپی "هەورامیانە" نزیکەی ساڵێکە چالاکن، لە دوو هاوژین و هاوڕێیەکیان پێکدێن و پێنج ئامێری مۆسیقا دەژەنن. نیکڕەفتار ئاماژەی بەوەدا کە لە هەموو شوێنێکی هەورامانەوە پەیوەندییان پێوە دەکرێت و خەڵکی دەنگخۆشیان پێدەناسێنن. گرووپەکەش سەردانیان دەکەن و دوای ڕاهێنان بە ئامێرەکانیانەوە لە کۆڵان و باخەکانیاندا بە دەنگ و ڕەنگی ڕەسەنی هەورامانەوە کلیپەکانیان تۆمار دەکەن.