عێراق و ئێران بۆ بەرەنگاربوونەوەی ماددە هۆشبەرەکان یاداشتێکی لێکتێگەیشتنی نوێ واژۆ دەکەن

ئاڤا نیوز

عێراق و ئێران هاوکارییەکانیان چڕتر دەکەنەوە بۆ بەرەنگاربوونەوەی ماددە هۆشبەرەکان و هەڵوەشاندنەوەی تۆڕەکانی قاچاخچیەتی، بۆ ئەو مەبەستەش یاداشتێکی لێکتێگەیشتنی نوێ واژۆ دەکەن.

وێنە گەورەکە: لەسەر ئاستی وڵاتانی جیهان، عێراق پلەی سێیەمی وەرگرتووە لەڕووبەڕووبوونەوەی ماددەی هۆشبەر، لەم نێوەندەشدا بەڕێوەبەرایەتیی گشتیی نەهێشتنی ماددەی هۆشبەری کوردستان پشکی شێری بەرکەوتووە.

لێدوانی ڕۆژنامەوانی: حوسێن زولفەقاری، جێگری سەرۆککۆماری ئێران و ئەمینداری گشتیی دەستەی ماددە هۆشبەرەکانی ئێران، ئەمڕۆ چوارشەممە 10ـی ئەیلوول لە کۆنگرەیەکی ڕۆژنامەوانی هاوبەشدا لەگەڵ وەزیری تەندروستی عێراق ڕایگەیاند، سبەی یاداشتێکی لێکتێگەیشتن لەگەڵ عێراق بۆ بەرەنگاربوونەوەی ماددە هۆشبەرەکان واژۆ دەکرێت، جەختیشی لەسەر قووڵایی هاوکاری نێوان عێراق و ئێران لە بوارەکانی بەرەنگاربوونەوەی ماددە هۆشبەرەکان و چارەسەرکردنی ئالودەبووان کردەوە.

لەهەمان کاتدا: زولفەقاری، ڕایگەیاند، "جەخت دەکەینەوە کە هاوکاریمان لە بوارە جیاوازەکاندا هەیە و کارمان لەسەر چڕکردنەوەی هاوکاری لە بواری بەرەنگاربوونەوەی ماددە هۆشبەرەکان و چارەسەرکردنی ئالودەبووان کردووە."

لەلایەکی دیکەوە: بە گوتەی زولفەقاری، "هەردوو وڵات ئەزموونی پێشکەوتوویان لە بوارە جیاوازەکانی پەیوەست بە بەرەنگاربوونەوەی ماددە هۆشبەرەکان هەیە و هاوکارن لە ڕاهێنانی کادیرانی پسپۆڕ لەم بوارەدا، وتیشی ئومێد دەکەین هاوکاری زیاتر لەسەر هەموو ئاستەکاندا هەبێت".