عێراق بەهۆی کوردستانەوە سێیەمی جیهانە لە ڕووبەڕووبوونەوەی ماددەی هۆشبەر

ئاڤا نیوز

لەسەر ئاستی وڵاتانی جیهان، عێراق پلەی سێیەمی وەرگرتووە لەڕووبەڕووبوونەوەی ماددەی هۆشبەر، لەم نێوەندەشدا بەڕێوەبەرایەتیی گشتیی نەهێشتنی ماددەی هۆشبەری کوردستان پشکی شێری بەرکەوتووە.

وێنە گەورەکە: وەزارەتی ناوخۆی عێراق ڕایگەیاندووە، لە چوارەمین لووتکەى پۆلیسى جیهانى کە پۆلیسى دوبەى ڕێکیخستبوو، پلەی سێیەمیان لە ڕووبەڕووبوونەوەی ماددەی هۆشبەر لەنێو 138 وڵات و 205 ڕێکخراوی حکومی و ناحکومی بەدەستهێناوە، ئەویش لە دواى هیندستان و مۆنتینیگرۆ کە پلەى یەکەم و دووەمیان گرتووە.

لێدوانی فەرمی: نەقیب ئەركان، گوتەبێژی بەڕێوەبەرایەتیی گشتی ماددە هۆشبەرەكانی هەرێمی كوردستان بە ئاڤای گوتووە، بەدڵنیاییەوە ئەو پلەیەی عێراق بەدەستی هێناوە، پشكی شێری سەركەوتنەكەی بەر حکومەتی هەرێمی کوردستان دەكەوێت.

"بەرێوەبەرایەتییەكەمان جگە لەوەی لە هەرێمی كوردستان سەركەوتنی گەورەی لە نەهێشتنی ماددە هۆشبەرەكان و دەستگیركردنی تاوانباران و بازرگانانی ماددە هۆشبەرەكان بەدەستهێناوە، بووینەتە هۆی ئەوەی کە لەسەر بنەمای زانیارییەكانی ئێمە چەندین باندی بازرگانیكردن بە ماددەی هۆشبەر لە عێراق ئاشكرا بكرێن".

"لەگەڵ عێراق چەندین ئوپەراسیۆنی هاوبەشی سەركەوتوومان کردووە و دەیان كەس دەستگیر كراون و دەستیش گیراوە بەسەر بڕێكی زۆر ماددەی هۆشبەر".

- بەپێی داتاکان له ساڵى 2022 تا مانگى چوارى ئەمساڵ، تەنیا لە سنووری پارێزگاکانی هەولێر و دهۆک شەش هەزار و 700 تۆمەتبار دەستگیر كراون، لەو ژمارەیەش سێ هەزار و  306 تۆمەتبار بەتۆمەتی كڕین و فرۆشتن و بازرگانیكردن بە ماددەی هۆشبەر گیراون.

- لە هەرێمی کوردستان بەتایبەت كار لەسەر دەستگیركردنی بازرگانانی ماددە هۆشبەرەكان كراوە و زیاتر جەختی لەسەر کراوەتەوە كە هۆكارن بۆ بڵاوبوونەوەی ماددەكە، هەر بۆیە زۆرترین ژمارەیان لێ دەستگیر كراوە، چ بازرگانی ناوخۆیی بن یان نێودەوڵەتی كە ویستبێتیان هەرێمی كوردستان وەك ترانزێتی گواستنەوەی ماددە هۆشبەرەكان بەکاربهێنن.