ئاڤای خەڵك؛ بڕیارێکی ئەنجوومەنی وەزیران دامەزراندنی حەوت کەسی لە هەڵەبجە ڕاگرت

ئاڤا نیوز

بەهۆی درەنگ گەیشتنی بەڵگەنامەکان و دەرچوونی بڕیاری نوێی ئەنجوومەنی وەزیران سەبارەت بە ڕاگرتنی دامەزراندن، حەوت کەس لە هەڵەبجە دامەزراندنەکەیان ڕاگیرا.

چیرۆکی سەرەکی: لە هەڵەبجە، 28 کەس بە بڕیاری ئەنجوومەنی وەزیران دامەزرێنران، بەڵام ناوی حەوت کەس لەو لیستەدا دەرهێنران و دامەزراندنەکەیان ڕاگیرا. ئەو کەسانە داوایان لە ئاڤا کردووە بەدواداچوون بۆ ئەم بابەتە بکات و هۆکاری ڕاگرتنی دامەزراندنەکەیان بزانرێت.

بەدواداچوونی ئاڤا: سەرچاوەیەک لە وەزارەتی دارایی بە ئاڤای ڕایگەیاند، هۆکاری ڕاگرتنی دامەزراندنی ئەو حەوت کەسە بۆ بوونی "کەم و کوڕی لە نووسراوەکانیان" دەگەڕێتەوە.  وتی: "بە نووسراو وەڵامی لایەنی سوودمەند دراوەتەوە و پێمان وتوون کە فایلی ئەو کەسانەمان بێ کەم و کوڕی بۆ بنێرن بۆ ئەوەی کاری پێویستیان بۆ بکەین."

بەڵام بە گوتەی سەرچاوەکە، نووسراوەکەیان زۆر درەنگ ناردووە، "هەتا بۆمان هات، ئەنجوومەنی وەزیران بڕیاری ژمارە 296ـی دەرکرد، کە تایبەتە بە ڕاگرتنی دامەزراندن بە هەموو شێوەیەک."