لەماوەی دوو ڕۆژدا 10 هەزار کەس سەردانی پێشانگای نێودەوڵەتیی بۆ وەبەرهێنان و خانووبەرەیان کردووە

ئاڤا نیوز


شەشەمین پێشانگای نێودەوڵەتیی بۆ وەبەرهێنان و خانووبەرە لە هەولێر، پێشوازی گەرمی لێکراوە و لەماوەی دوو ڕۆژی یەکەمدا زیاتر لە 10 هەزار کەس سەردانی پێشانگاکەی کردووە.

چیرۆکی سەرەکی: ڕۆژی سێشەممە 9-9-2025 شەشەمین پێشانگای نێودەوڵەتیی بۆ وەبەرهێنان و خانووبەرە لە هەولێر کرایەوە، 280 کۆمپانیا لە 16 وڵاتی جیهانەوە بەشدارییان کردووە، ماوەی چوار ڕۆژ بەردەوام دەبێت و لە کاتژمێر 10:00ـی بەیانی تاوەکو 6:00ـی ئێوارە کراوەیە.

لێدوانی فەرمی: هۆرە سامان، گوتەبێژی پێشانگاکە، بە ئاڤا میدیای گوت: لە دوو ڕۆژی یەکەمدا زیاتر لە 10 هەزار کەس سەردانی پێشانگای کردووە، تەنیا لە ڕۆژی یەکەم 65 خانوو و ڤێلا و 32 شوقە فرۆشراون، هاوکات هەڵسەنگاندنی کۆمپانیاکان بۆ دیدار و چاوپێکەوتنەکانیان و بەشداری خەڵک و کۆمپانیاکان زۆرباشە.

زانیاریی زیاتر: کۆمپانیا بەشداربووەکان ئۆفەری جیاوازی تایبەت بە پێشانگایان ڕاگەیاندووە وەک داشکاندن لە نرخەکان، درێژکردنەوەی ماوەی قیستەکان و ئەنجامدانی تیروپشک بۆ دیاری بۆ کڕیاران.

بۆچی گرنگە: ئەم پێشانگایە دەرفەتێکە بۆ ئەوەی کۆمپانیا جیهانییەکان ڕوو لە هەرێمی کوردستان بکەن، سەرمایەکانیان بخەنەگەڕ و وەبەرهێنان بکەن، لە هەمان کاتیش بۆ کڕیاران هەلێكی زێڕینە بۆ سوود وەرگرتن لە ئۆفەر و داشکانە تایبەتەکان.

ئەوەی پێویستە بیزانیت: ئاڤا میدیا سپۆنسەری سەرەکی میدیایی پێشانگاکەیە و ستۆدیۆیەکی تایبەتی لەو هەیە ڕۆژانە ڕووماڵێکی پڕۆفیشناڵی سەرجەم چالاکییەکانی پێشانگاکە دەکات.