دیاردەیەکی نامۆ؛ دوو دارخورما لە حەوشەیەکی هەڵەبجەدا دەڕوێن

ئاڤا نیوز

 

لەناو حەوشەی ماڵێکدا لە شاری هەڵەبجە، دوو دارخورما گەشەیان کردووە و ئێستا هێشووە زەردەکانیان بە دارەکاندا شۆڕ بوونەتەوە، وێنەیەکی سەرنجڕاکێشیان دروست کردووە.

 

ئەوەی پێویستە بیزانیت: لەمبارەیەوە، ئومێد ئەحمەد، شارەزای بواری کشتوکاڵ، هەرچەندە پیتاندنی بۆ ئەم دارخورمایانە ئەنجام داوە، بەڵام پێی وایە داری خورما بە شێوەیەکی گشتی نامۆیە بە کشتوکاڵ و کەشوهەوای شاری هەڵەبجە.

 

هۆکارە زانراوەکان: ئومێد ئەحمەد ڕوونیدەکاتەوە: "ڕەنگە دارخورمایەک بتوانێت لە کەشوهەوای شارێکی وەک هەڵەبجەدا بڕوێت، بەتایبەتی ئەگەر لەناو حەوشەی ماڵێکدا بچێندرێت، چونکە لەو حاڵەتەدا تا ڕادەیەک لە سەرمای زۆر دەپارێزرێت و ئەگەری مانەوەی زیاترە." بەڵام ئەو شارەزایە جەخت لەوە دەکاتەوە کە "ئەگەر مەبەست بێت باخێکی گەورەی دارخورما دابندرێت، ئەوا سەرکەوتوو نابێت، چونکە ناتوانرێت ڕووبەرێکی فراوان لە سەرمای زۆر بپارێزرێت و لە ئەنجامدا دارەکان لەناو دەچن."