ئاڤای خەڵک؛ دوای بەدواداچوونی ئاڤا وەزارەتی دارایی پارەی کۆمپانیای ئەرتووش خەرج دەکات

ئاڤا نیوز

دوای بڵاوبوونەوەی ڕاپۆرتی ئاڤا لەسەر کێشەکانی کۆمپانیای ئەرتووش، کە ماوەی هەشت مانگ بوو لەلایەن وەزارەتی داراییەوە پارەیان بۆ خەرج نەکرا بوو، ئێستا کێشەکە چارەسەر بووە و بڕیاری خەرجکردنی پارەکە دراوە.

چیرۆکی سەرەکی: کۆمپانیای ئەرتووش، کە بەرپرسیارە لە هەڵگرتنەوەی خۆڵ و خاشاکی سنووری دهۆک و سێمێل، بەهۆی دواکەوتنی پارەکەیانەوە تووشی چەندین گرفت ببوون. ئەم کۆمپانیایە 435 کارمەندی هەیە و ڕۆژانە نزیکەی 700 تۆن خۆڵ و خاشاک لەو دوو ناوچەیە کۆدەکەنەوە، بۆیە دواکەوتنی پارەکەیان کاریگەری نەرێنی لەسەر خزمەتگوزارییەکانی شارەوانی دروستکردبوو.

نووسراوی فەرمی: بەگوێرەی نووسراوێکی فەرمی کە لە وەزارەتی داراییەوە ئاراستەی گەنجینەی دهۆک کراوە، بڕی چوار ملیار و 999 ملیۆن دینار بۆ کۆمپانیای ئەرتووش خەرج دەکرێت. هاوکات، بڕی دوو ملیار و 632 ملیۆن دیناری دیکەش بۆ کارەکانی قەزای سێمێل خەرج دەکرێت، کە بەشێکە لە خزمەتگوزارییەکانی ئەم کۆمپانیایە.