شێخ دارا: بارانبارین نزیکە و ئەمساڵ زستانێکی پڕ بارانمان دەبێت

ئاڤا نیوز

بەپێی پێشبینییەکانی کەشوهەوا، بارانبارین نزیکە و ئەمساڵ جیاوازتر لە ساڵی ڕابردوو، هەرێمی کوردستان زستانێکی پڕ بارانی دەبێت.

لێدوانی فەرمی: شێخ دارا، پێشکەشکاری کەشوهەوای ئاڤا میدیا ڕایگەیاند، بەپێی پێشبینییەکانی کەشوهەوا، ئەمساڵ با و بۆرانێکی زۆر ڕوو لە هەرێمی کوردستان و ناوچەکە دەکات کە هاوشێوەی ساڵانی 2011 و 2012، 2019 و 2022، 2023 دەبێت، واتە زستانێکی پڕ باران دەبێت. هەروەها "بارانبارین نزیک بووەتەوە".

هەر پشتبەستن بە پێشبینییەکانی کەشوهەوا، شێخ دارا دەڵێت، ئەمساڵ لە خوارووی عێراق و سعوودیە لە ناوچەی "ربع الخالي" کە ڕووبەرەکەی 630 هەزار کیلۆمەتر چوارگۆشەیە، بارانێکی ئەوەندە زۆر دەبارێت کە جووتیاران دەتوانن کشتوکاڵی تێدا بکەن.

ئاماژە بەوەش دەکات، لە ناوچەی ترێبیل و نخێب، لە یەکەم شەپۆڵی هاتنیدا، بارانێکی زۆر دەبارێت. هەموو ئەمانەش بەهۆی بارانی جەمسەری باکوورەوەیە.

زانیاریی زیاتر: شێخ دارا دەڵێت، پلەکانی گەرما هەمیشە لە دابەزینە کە ڕۆژانە یەک بۆ دوو پلە دادەبەزێت، بە تایبەت لە شەواندا لە هیچ شار و شارۆچکەیەکی هەرێمی کوردستان پلەکانی گەرما ناگاتە 25 پلەی سیلیزی و ئەگەر هەیە لە هەفتەی داهاتوو  پلەکانی گەرما بۆ خوار 30 پلەی سیلیزی دابەزێت.

ئەوەی پێویستە بیزانیت: بەرزترین و نزمترین پلەکانی گەرما لە شار و شارۆچکەکانی هەرێمی کوردستان بەمشێوەیەیە:

٠ هەولێر: بەرزترین 35 پلە و نزمترین 25 پلە

٠ سلێمانی: بەرزترین 33 پلە و نزمترین 22 پلە

٠ دهۆک: بەرزترین 30 پلە و نزمترین 16 پلە

٠ کەرکووک: بەرزترین 36 پلە و نزمترین 26 پلە

٠ هەڵەبجە: بەرزترین 34 پلە و نزمترین 24 پلە

٠ زاخۆ: بەرزترین 34 پلە و نزمترین 22 پلە

٠ ڕاپەڕین: بەرزترین 33 پلە و نزمترین 22 پلە

٠ سۆران: بەرزترین 32 پلە و نزمترین 16 پلە

٠ گەرمیان: بەرزترین 36 پلە و نزمترین 24 پلە

٠ حاجی ئۆمەران: بەرزترین 23 پلە و نزمترین 10 پلە

٠ ئاکرێ: بەرزترین 32 پلە و نزمترین 15 پلە