وەزارەتی خوێندنی باڵا داوای ناوی سێ یەکەمەکان و دەرچووانی پزیشکی دەکات بۆ دامەزراندن

ئاڤا نیوز

وەزارەتی خوێندنی باڵا و توێژینەوەی زانستی هەرێمی کوردستان نووسراوێکی بۆ گشت زانکۆکان ناردووە، داوا دەکات ئاماری سێ یەکەمەکانی بەشە پزیشکییەکان و بڕوانامەی باڵا بۆ ساڵی 2017 تا 2025 ئامادە بکەن، تا لە بودجەی وەزارەت جێی بۆ بکەنەوە.

وێنە گەورەکە: ماوەی 11 ساڵە حکومەتی عێراق بودجەی هەرێمی کوردستانی بڕیوە و مووچەی فەرمانبەران دوادەخات، بەو هۆیەوە پشکی هەرێمی کوردستان لە دامەزراندنی فەرمانبەران وەک خۆی جێبەجێ ناکرێت.

لێدوانی فەرمی: د.توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی بە ئاڤا میدیای وت، وەزارەتی دارایی فیدڕاڵی عێراق نووسراوی کردووە بۆ ناردنی ئاماری دەرچووان، ئێمەش گشتاندنمان کردووە بۆ هەموو زانکۆ حکومییەکان لەسەر ئاستی هەرێمی کوردستان، لە ماوەی یەک مانگدا پێویستە ئاماری تایبەت بە یەکەمەکانی ساڵانی 2017-2018 تاوەکو 2024-2025 بە زمانی عەرەبی بنێرن، کە سێ یەکەمەکانی هەریەکە لە بڕوانامەی باڵای کۆلیژ و پەیمانگەکان دەگرێتەوە، لەگەڵ بەشی پزیشکی گشتی و دەرچووانی بەشە تەندروستی و پزیشکییەکان.

د.توانا نەجەف دەشڵێت: ئاماری ساڵانی 2017 تاوەکو ساڵی 2023ـی سێ یەکەمەکانمان لایە، بەڵام لە 2023 تاوەکو 2025ـمان لا نییە، ئەم هەنگاوە بۆ ئەوەیە تا بزانین چەند پارەمان پێویستە بۆ ئەوەی لە بودجەی تەرخانکراوی وەزارەت بۆ 2026 دیاری بکەین و جێی بۆ بکەینەوە. دواتر بۆ وەزارەتی دارایی هەرێمی کوردستانی بنێرین و ئەوانیش بۆ وەزارەتی دارایی فیدڕاڵی بنێرن، هاوکات بۆ ئەوەشە بزانین ژمارەی تێکڕای سێ یەکەمەکان چەندە.