گەیاندنی خزمەتگوزارییەكان بە كەرتی باغلومنارە خێراتر دەكرێت

ئاڤا نیوز

جێبەجێكردنی پرۆژەكانی كەرتی باغلومنارە لە شاری هەولێر چڕتر دەكرێتەوە، تیمەكانی جێبەجێكاری پرۆژەكانیش ڕاسپێردراون لە نزیكترین كاتدا كارەكان تەواو بكەن.

چیرۆكی سەرەكی: لەسەر فەرمانی مەسرور بارزانی، سەرۆكی حكومەتی هەرێمی كوردستان، ساڵێك لەمەوبەر، وەزیری شارەوانی و گەشتوگوزار لە ڕێوڕەسمێكدا، بەردی بناغەی ژمارەیەك پرۆژەی خزمەتگوزاری لە كەرتی باغڵومنارە دانا كە بە گوژمەی 25 ملیار دینار جێبەجێ دەكرێن و پرۆژەكە ئێستا كەوتووەتە باری جێبەجێكردنەوە.

لێدوانی فەرمی: كارزان عەبدولهادی، سەرۆكی شارەوانیی هەولێر بە ئاڤای ڕاگەیاند، لەسەر ڕاسپاردەی وەزیری شارەوانی و گەشتوگوزاری هەرێمی كوردستان، ئەمڕۆ تیمەكانی جێبەجێكاری پرۆژەكانی كەرتی باغڵومنارەمان ڕاسپارد، كارەكان خێراتر بكرێت و هەوڵەكان چڕتربكرێنەوە بەمەبەستی خێرا تەواوكردنی كارەكانی كەرتەکە، ئەوەش لەپێناو خزمەتكردنی زیاتری خاوەن زەوییەكانی كەرتی باغڵومنارە.

لەلایەکی دیکەوە: یونس حوسێن، بە ناوی دانیشتووانی سنووری باغڵومنارە بە ئاڤای ڕاگەیاند، داوا دەكەین پەلە بكرێت لە گەیاندنی خزمەتگوزارییەكان، بەو پێیەی زۆرینەی دانیشتووانی ئەو گەڕەكە كەمدەرامەتن و لەڕووی خزمەتگوزارییەوە ماوەیەكی زۆرە كەموكوڕیمان هەیە بەتایبەت لە سێكتەری ئاوەڕۆ، قیرتاوكردنی كۆڵان و شەقامە لاوەكییەكان.

ئەو هاونیشتمانییە وتیشی، هەرچەندە بەر لە ساڵێك بەردی بناغەی پرۆژەكانی كەرتی باغلومنارە دانراوە، بەڵام جێی دەستخۆشییە ئێستاش و لەمەبەدوا ڕیتمی تەواوكردنی پرۆژەكان خێراتر بكرێت.