لە سێیەم ساڵیادی ژینا ئەمینی دووکان و بازاڕەکانی بەشێک لە شارەکانی ڕۆژهەڵاتی کوردستان داخران

ئاڤا نیوز

لەگەڵ سێیەمین ساڵیادی گیان لەدەستدانی ژینا ئەمینی و سەرهەڵدانی بزووتنەوەی "ژن، ژیان، ئازادی" هێزە ئەمنییەکانی ئێران پەیوەندیی تەلەفۆنی بە چالاکوانانی بواری مافەکانی ژنانەوە دەکەن و لێپیچینەوەش لەگەڵ چەند چالاکوانێک دەکەن. هاوکات لە چەند شارێک بازاڕ و دوکانەکان داخران.

وێنە گەورەکە: سێ ساڵ لەمەوبەر شەپۆلی ناڕەزاییەتییەکانی گیان لەدەستدانی "مەهسا ئەمینی" ناسراو بە ژینا ئەمینی، شەقامەکانی ڕۆژهەڵاتی کوردستان و ئێرانی گرتەوە، بەجۆرێک بزووتنەوەی "ژن، ژیان، ئازادی" هاتە کایەوە و سەدان هەزار کەس لە سەرتاسەری ئێران بەشدارییان لە خۆپیشاندانەکاندا کرد. 

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند،  "لە ڕۆژانی رابردوودا ئیدارەی ئیتلاعاتی سنە لە رێگەی تەلەفۆنەوە پەیوەندییان بە چەند چالاکوانێکی ژنەوە کردووە، ئامانجەکە ئەوە بووە بە زیاترکردنی گوشار و هەڕەشەکان بۆ سەر ژنان پێش بە هەر جۆرە چالاکییەک بگرن".

زانیاریی زیاتر: بە گوتەی ئەندامەکەی ڕێکخراوی مافی مرۆڤی هەنگاو، "ئەم پەیوەندیانە هەڕەشەئامێز بوون و ئامانجەکەی دروستکردنی ترس و تۆقاندن بووە بۆ چالاکوانانی مافەکانی ژنان. چەندین چالاکوانیش بانگ کراون و لێپرسینەوەیان لەگەڵ کراوە".

ئەمەش بزانە: هێزە ئەمنییەکانی ئێران لە بەشێکی شارەکانی ڕۆژهەڵاتی کوردستان بڵاوەیان پێکراوە و هەوڵدەدەن پێش بە جۆرە چالاکییەکی مەدەنی بگرن. ئەمڕۆش بەشێکی زۆری بازاڕ و دووکانەکانی ڕۆژهەڵاتی کوردستان داخراون.