ئەمساڵ هەشت هەزار منداڵ لە قوتابخانە کوردییەکانی کەرکووک تۆمارکراون

ئاڤا نیوز

 

سەرپەرشتیاری خوێندنی کوردی لە کەرکووک دەڵێت، " ئەمساڵ هەشت هەزار منداڵ لە پۆلی یەکەم لە خوێندنگە کوردییەکانی کەرکووک تۆمار کراون".

 

وێنە گەورەکە: د.شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق بۆ پێشکەوتنی سێکتەری پەروەردە و  خوێن بە زمانی دایک لە کەرکووک، هەڵمەتێکی بەناونیشانی 'نەوەی ئایندە' بۆ قوتابیانی قۆناغی سەرەتایی بەتایبەت ئەوانەی ئەمساڵ (2025-2026) دەخرێنە بەر خوێندن، ڕاگەیاندووە، بۆ ئەو مەبەستەش  پێداویستییەکانی خوێندنیان لە ئەستۆ دەگرێت.

 

لێدوانی فەرمی: کامەران عەلی، سەرپەرشتیاری خوێندنی کوردی لە کەرکووک بە ئاڤا میدیای ڕاگەیاند: ئەمساڵ هەشت هەزار قوتابی پۆلی یەک لە خوێندنگە کوردییەکان تۆمار کراون، بە بەراورد بە ساڵی ڕابردوو هەزار قوتابی زیادی کردووە.

 

-سەرپەرشتیاری خوێندنی کوردی دەڵێت: ساڵانە خواست لەسەر خوێندن بە زمانی کوردی لە کەرکووک زیاد دەکات، هۆکارەکەشی بۆ ئەوە دەگەڕێتەوە کە ڕێژەی دەرچوون لە خوێندنگە کوردییەکان زیاترە و ئیدارەیان ڕێک و پێکترە.

 

-بەگوێرەی کامەران عەلی ڕێژەی خوێندن بە زمانی عەرەبی و تورکمانی لە کەرکووک کەمی کردووە، هۆکارەکەشی بۆ بێسەروبەری ئیداری و گەندەڵی دەگەڕێتەوە.

 

زانیاریی زیاتر: ئێستا 100 هەزار قوتابی لە خوێندنگە کوردییەکانی کەرکووک بە زمانی کوردی دەخوێنن.

 

لەلایەکی دیکە: بە گوتەی سەرپەرشتیاری خوێندنی کوردی لە کەرکووک، سەرەڕای ئەوەی قوتابیان لە خوێندنگە عەرەبییەکان دەچنە خوێندنگە کوردییەکان، هاوکات لە لادێکانی سنووری کەرکووکیش قوتابی عەرەب دەچنە خوێندنگە کوردییەکان، بەڵام ژمارەیان کەمە.

 

ئەمەش بزانە: بەخێوکەری قوتابیانی سەرەتایی لە کەرکووک دەتوانن ئەم لینکە پڕبکەنەوە، لە ماوەیەکی کەمدا تیمی جێگری سەرۆکی ئەنجوومەنی نوێنەرانی عێراق وەڵامیان دەدەنەوە و پێداویستییەکان بۆ قوتابییەکانیان دابین دەکەن.