تۆمەتبارێک لە سلێمانی ژنەکەی خۆی کوشت و لە میسان دەستگیر کرا

ئاڤا نیوز 

 

بەڕێوەبەرایەتیی پۆلیسی پارێزگای سلێمانی بە هەماهەنگیی پۆلیسی نەهێشتنی تاوانی پارێزگای میسان تۆمەتبارێکی لە میسان دەستگیر کرد کە دوو ساڵ پێشتر لە سلێمانی تاوانێکی کوشتنی ئەنجام دابوو.

 

چیرۆکی سەرەکی: دوو ساڵ لەمەوبەر لە گەڕەکی سەرچناری شاری سلێمانی ژنێکی بە ڕەچەڵەک عەرەب لە ماڵێکدا کوژرا، لە کاتی ڕوودانی تاوانەکە تۆمەتبارێک لەسەر دۆسییەکە دەستگیرکرا و دادوەری لێکۆڵینەوە بەپێی ماددەی 406 بڕیاری دەستگیرکردنی بۆ تۆمەتبارێکی دیکە دەرکرد. هێزەکانی پۆلیس لە بەدواداچوونەکانیان بەردەوام بوون بۆ دەستنیشانکردنی شوێنی تۆمەتبار و دەستگیرکردنی.

 

ڕاگەیێنراوی فەرمی: بەڕێوەبەرایەتیی پۆلیسی پارێزگای سلێمانی ڕایگەیاند، مەفرەزەکانی نوسینگەی لێکۆڵینەوە لە تاوانەکانی کوشتنی سەر بە بەشی پۆلیسی نەهێشتنی تاوانی بەڕێوەبەرایەتیمان، بە هاوکاریی پۆلیسی نەهێشتنی تاوانی پارێزگای میسان توانییان لەسەر دۆسیەی کوشتنی ژنەکە،  شوێنی تۆمەتباری دووەم لەو پارێزگایە بدۆزنەوە و دەستگیری بکەن.

 

بەپێی ڕاگەیێنراوەکە، تۆمەتبار (ع، ع، ع) بە ڕەچەڵەک  عەرەبە و هاوسەری کوژراوەکەیە، ئێستا بە بڕیاری دادوەر ڕاگیراوە و لێکۆڵینەوەش لە دۆسییەکە بەردەوامە.