لە هەولێر تاوەکو ئێستا 18 هەزار سەگ براونەتە پەناگەی سەگە بێلانەکان

ئاڤا نیوز

ڕۆژانە لەنێو کوچە و کۆڵانەکانی شار و شارۆچکەکانی هەرێمی کوردستاندا ڕووداوەکانی پەلاماردانی سەگ تۆمار دەکرێت و پرۆسەی کۆکردنەوەی سەگی بێلانەش بەردەوامە.  

وێنە گەورەکە: بەهۆی زۆربوونی ژمارەی سەگە بێلانەکان و پەرلەماردانی دەیان کەس، نزیکەی دوو ساڵە پرۆسەی کۆکردنەوەی سەگی بێڵانە لە نێو کوچە کۆڵانەکانی شاری هەولێر و دەوروبەری دەستیپێکردووە، رۆژانە دوو تیم نزیکەی 50 سەگ دەبەنە پەناگەی سەگە بێلانەکانی هەولێر.

ئەوەی پێویستە بیزانیت: بەگوێرەی داتا تۆمارکراوەکانی هەردوو نەخۆشخانەی فریاکەوتنی ڕۆژئاوا و فریاکەوتنی ڕۆژهەڵاتی شاری هەولێر، لە ماوەی نۆ مانگی ڕابردوو نزیکەی هەزار ڕووداوی پەلاماردانی سەگ تۆمارکراون، سەرجەمیان لە نەخۆشخانەکان چارەسەریان وەرگرتووە.

لێدوانی فەرمی: ژیار جەلال، بەڕێوەبەری گشتیی بەڕێوەبەرایەتیی خزمەتگوزاریی ژینگەپارێزی هەولێر بە ئاڤای ڕاگەیاند: پڕۆسەی کۆکردنەوەی سەگی بێلانە لەنێو کوچە و کۆڵانەکاندا بەردەوامە، تاوەکو ئێستا 18 هەزار سەگ براونەتە پەناگەی سەگە بێلانەکانی هەولێر، پرۆسەکە بەردەوامە و بەباشی بەڕێوەدەچێت.