بازرگانی عێراق: ناوی سێ ملیۆن کەس لە پسوولەی خۆراک سڕدرایەوە

ئاڤا نیوز

وەزارەتی بازرگانی عێراق دەڵێت، بەهۆی ئەوەی گەشتیان بۆ دەرەوەی وڵات کردووە یان کۆچی دواییان کردووە، بەهۆی کۆبۆنی ئەلیکترۆنی خۆراکەوە ناوی سێ ملیۆن کەس لە وەرگرتنی بەشە خۆراک سڕدراوەتەوە، ئاشکراشی دەکات لەمەودوا ئەوانەی لە عێراق و هەرێمی کوردستان لە بەشەخۆراک سوودمەند دەبن ژمارەیان دەگاتە 41 ملیۆن کەس.

وێنە گەورەکە: ماوەی چەندین مانگە وەزارەتی بازرگانی عێراق دەستیکردووە بە نوێکردنەوەی پسوولەی خۆراک بەشێوەی ئەلیکترۆنی، لە نوێکردنەوەی پسوولەش ئاسانکاریی بۆ هاووڵاتیان کراوە و هەموو کەسێک لە ماڵەوە دەتوانێت فۆرمی خۆیی و خێزانەکەی پڕبکاتەوە، تاکە مەرجیش ئەوەیە کەسەکە لەناوەوەی وڵات پڕی بکاتەوە، چونکە بەرنامەکە لە دەرەوەی وڵات کارناکات.

لێدوانی فەرمی: محەممەد حەنوون، وتەبێژی وەزارەتی بازرگانی عێراق بە ڕۆژنامەی سەباحی ڕاگەیاندووە، وەزارەتەکەیان بەردەوامە لە پرۆسەی بەئەلیکترۆنیکردنی سەرجەم کاروبارەکان لەوانەش پسوولەی خۆراک، پێشبینیش دەکات لەمەودوا ژمارەی ئەوانەی لە وەرگرتنی بەشە خۆراک سوودمەند دەبن بگاتە 41 ملیۆن کەس.

زانیاریی زیاتر: بە گوتەی حەنوون، تائێستا بەهۆی پسوولەی ئەلیکترۆنی خۆراکەوە ناوی سێ ملیۆن کەس لە وەرگرتنی بەشە خۆراک سڕدراوەتەوە ئەوانیش ئەوانەن کە لەدەرەوەی وڵات دەژین یان کۆچی دواییان کردووە،  25ـی ئەم مانگەش کۆتا وادەیە بۆ پڕکردنەوەی پسوولەی ئەلیکترۆنی خۆراک و بەرنامەکە ڕادەگیرێت، دواتریش بەشی سڕینەوە و زیادکردنی ئەندامانی خێزان بۆ ئەپڵیکەیشنە زیاد دەکرێت.