ئاڤا ئەنجامی کۆبوونەوەی ئەنجوومەنی دەوڵەت ئاشکرا دەکات؛ لە بەژەوەندیی کوردستانە

ئاڤا نیوز

دوای چوار کۆبوونەوە، ئەنجوومەنی دەوڵەت لەبارەی داهاتی نانەوتی کوردستان گەیشتە ئەنجام و بەگوێرەی زانیارییەکانی ئاڤا میدیا ئەنجامەکەی لە "بەرژەوەندیی" کوردستان دەبێت.

چیرۆکی سەرەکی: دوای چەندین مانگ لە گفتوگۆ و دانوستان لەنێوان شاندەکانی حکومەتی هەرێمی کوردستان و حکومەتی عێراق، ئەم بابەتە یەکلانەکرایەوە، بۆیە محەممەد شیاع سوودانی، سەرۆکوەزیرانی عێراق، نووسراوی فەرمی بۆ ئەنجوومەنی دەوڵەت کرد و داوای کرد ئەنجوومەنەکە ڕای یاسایی خۆی بخاتەڕوو، ئێستا بابەتەکە خەریکە بە قازانجی هەرێمی کوردستان دەشکێتەوە و گرفتەکان بەرەو چارەسەربوون بچن.

زانیاریی تایبەت: بەگوێرەی ئەو زانیارییانەی لە سەرچاوەیەک لە نێو کۆبوونەوەی ئەنجوومەنی دەوڵەتەوە بە ئاڤا میدیا دراوە، ئەوەی پشتڕاست کردەوە بۆچوونەکەی ئەنجوومەنی دەوڵەت لەبارەی داهاتی نانەوتی کوردستان لە بەرژەوەندی هەرێمی کوردستان دەبێت و ڕۆژی یەکشەممەش ئەنجامی کۆبوونەوەکە دوای واژۆکردنی لەلایەن ئەندامەکانییەوە بۆ ئەنجوومەنی وەزیران ڕەوانە دەکرێت.

زانیاریی زیاتر: هەر بەگوتەی ئەو سەرچاوەیە، لە کۆبوونەوەکەی ئەمڕۆ نزیکەی 14 ئەندام بەشدار بوونە و زۆرینەی ئەندامەکانیش بە پشت بەستن بە دەقە یاساییەکان مافیان بە هەرێمی کوردستان داوە لە داواکارییانەی هەیبووە، هەربۆیەش زۆرینەیان لەسەر کۆنووسی ئەنجامی کۆبوونەوەکەی واژۆ دەکەن.

ئەوەی پێویستە بیزانیت: ناکۆکییەکانی نێوان هەردوو حکومەت لەسەر چۆنیەتی دابەشکردنی داهاتی نانەوتی هەرێمی کوردستانە. حکومەتی عێراق داوا دەکات هەولێر سەدا سەدی داهاتی نانەوتی بداتە بەغدا بکات و دواتر تەنیا سەدا 50ی داهاتی گومرگ بۆ هەرێم بگەڕێنرێتەوە. لە بەرامبەردا، حکومەتی کوردستان ئامادەیی دەربڕیوە سەدا 50ی داهاتە فیدراڵییەکان، گومرگ و باج بدات بە بەغدا، بە مەرجێک سەدا سەدی ڕسووماتی ناوخۆ بۆ هەرێمی کوردستان بێت.