ئاڤای خەڵک؛ دانیشتووانی گەڕەکی کەنەسوورەی سلێمانی لە بۆنی ناخۆشی ئاوەڕۆ نیگەرانن

ئاڤا نیوز

دانیشتووانی گەڕەکی کەنەسورەی سلێمانی، بەهۆی نەبوونی خزمەتگوزارییەوە لە هەرچوار وەرزی ساڵدا تووشی گرفتی گەورەبوون و داوایان لە ئاڤا کردووە دەنگیان بگەیەنێت بە لایەنی پەیوەندیدار.

چیرۆکی سەرەکی: دانیشتووانی ئەم گەڕەکەی سلێمانی لە وەرزی هاویندا بەدەست بۆنی ناخۆشی ئاوەڕۆوە و لە زستانیش بەدەست لافاوەوە تووشی ئاستەنگی زۆر دەبنەوە، تاوەکو ئێستا کەس هەوڵی چارەسەرکردنی ئەو گرفتەی بۆ نەداون. 

زانیاریی زیاتر: ئەمە جگە لەوەی دیمەنێکی ناشرین و ناشارستانی بەو گەڕەکە داوە، بووەتە سەرچاوەی بڵاوبوونەوەی نەخۆشی ڤایرۆسیش چوونکە ئاوەڕۆی سەرجەم گەڕەکەکان دێتەوە ناو ئەو کۆڵانە. 

لێدوانی فەرمییەکان: هاوکار عوسمان، دانیشتووی ئەو گەڕەکەی سلێمانییە دەڵێت: لە ژیانی خۆمان تەواو بێزارین، هیچ خزمەتگوزارییەکمان نییە، ئەمە جگە لەوەی بەهۆی تێپەڕبوونی ئاوەڕۆ مەترسی تەندروستی و بڵاوبوونەوەی نەخۆشی و ڤایرۆسمان لەسەرە، بۆ مناڵانیش مەترسیەکەی زیاترە، چونکە زۆرجار بەهۆی یاریکردنی مناڵان لەو ناوە دەکەونە ناو ئاوەڕۆکە.

شاراوانی سلێمانی لەبارەیەوە بە ئاڤای ڕاگەیاند: شارەوانی دەڵێن، جێبەجێکردنی پڕۆژە خزمەتگوزاریەکان پەیوەستە بە بودجەوە. بەڵام هەوڵدەدەن لە نزیکترین کاتدا خزمەتگوزاریان پێ بگەینن.

دەشڵێت، لە پلانی شارەوانیدا هەیە چارەسەری گرفتی ئاوەرۆی گەڕەکەکەش بکرێت، تا ئێستا بەشێکی پڕۆژەکە تەواو کراوە، بەڵام ئەوەی تر ماویەتی.