وەزیری شارەوانی: زیاتر لە 600 ملیار دینار قەرزی ئاو لای هاووڵاتیانە و نەدراوەتەوە حکومەت

ئاڤا نیوز

 

وەزارەتی شارەوانی ڕایگەیاند، یەک ملیۆن و 200 هەزار بەشداربووی هاوبەشی ئاو هەیە و لە بڕیارەکەی سەرۆکوەزیران بارزانی بۆ 20%ـی لێخۆشبوون سوودمەند دەبن.

 
لێدوانی فەرمی: ساسان عەونی، وەزیری شارەوانی و گەشتوگوزاری هەرێمی کوردستان بە ئاڤا نیوزی ڕاگەیاند:  زیاتر لە 600 ملیار دینار قەرزی ئاو لای هاووڵاتیانە و نەدراوەتەوە حکومەت، بە بڕیاری سەرۆکوەزیران 20%ـی ئەم پارەیە لێخۆشبوونی بۆ دەکرێت، بەم پێیەش بڕی پارە لێخۆشبووەکە دەکاتە 120 ملیار دینار.

 

ئەوەی پێویستە بیزانیت: بڕیاری 20%ـی لێخۆشبوون، لە وەزارەتی شارەوانی هەریەک لە کرێی ئاو، خۆڵ و خاشاک، ساڵانەی کرێچییەکان، ڕسووماتی پیشەیی، هەڵواسینی تابلۆ دەگرێتەوە و تاوەکو بارودۆخی دارایی هەرێمی کوردستان باش دەبێت کاری پێدەکرێت.

 
باکگراوند: ڕۆژی 27-03-2024، سەرۆکوەزیران لە کۆبوونەوەی ئەنجوومەنی وەزیراندا بڕیاری دا بە لێخۆشبوونی 20%ـی داشكاندن بۆ قەرزی ئاو و كرێی كرێچییەكان و سزای دواكەوتنی باج لە پیشەوەران و كەمدەرامەتان.