پاکستان: بەرنامە ئەتۆمییەکەمان بەپێی ڕێککەوتنی هاوبەشی بەرگری بۆ سعوودیە بەردەستە

ئاڤا نیوز

وەزیری بەرگریی پاکستان دەڵێت، بەرنامەی ئەتۆمی وڵاتەکەی بەردەستە بۆ سعوودیە ئەگەر پێویست بکات، ئەمەش بەگوێرەی ڕێککەوتنی بەرگریی هاوبەشی نێوان هەردوو وڵات.

چیرۆکی سەرەکی: ڕۆژی 17ـی ئەم مانگە، پاکستان و سعوودیە ڕێککەوتنێکی هاوبەشی بەرگریی ستراتیژییان واژۆ کرد، بەگوێرەی ڕێککەوتنەکە، هەر هێرشێک لە وڵاتانی دیکەوە بۆ سەر هەر یەکێک لەو دوو وڵاتە هێرشە بۆ سەر هەردوو وڵات و پێویستە لە کاتی جەنگدا بەیەکەوە بەرگری لەیەکتر بکەن.

ڕاگەیێنراوی فەرمی: لە ڕاگەیێنراوێکدا خەواجە ئاسیف، وەزیری بەرگریی پاکستان ڕایگەیاند: مافی بنچینەیی وڵاتان و گەلانی ناوچەکە بەتایبەتی دانیشتووانی موسڵمانە پێکەوە بەرگری لە ناوچەکە و وڵاتەکانیان و نەتەوەکانیان بکەن، ڕێککەوتنەکە هیچ بڕگەیەکی تێدا نییە کە هاتنە ناوەوەی وڵاتانی دیکە قەدەغە بکات، هاوکات ڕێگریش ناکات لە پاکستان لە واژۆکردنی ڕێککەوتنێکی هاوشێوە لەگەڵ هیچ وڵاتێکی دیکە.

سەبارەت بە ئەگەری هاتنە ناوەوەی وڵاتانی دیکەی عەرەبی بۆ ناو ڕێککەوتنەکە وتی: ناتوانم زوو وەڵامی ئەوە بدەمەوە، بەڵام بە دڵنیاییەوە دەڵێم دەرگاکان داخراو نین.

زانیاریی زیاتر: پاکستان یەکێکە لە نۆ دەوڵەتی خاوەن چەکی ئەتۆمی لە جیهاندا، هەروەها یەکەم وڵاتی ئیسلامییە کە خاوەنی چەکی ئەتۆمی بێت کە لە ساڵی 1998 بۆ یەکەم جار ئەو چەکەی بەرهەمهێنا، حەوتەم گەورەترین هێزی ئەتۆمییە لە جیهاندا و مەزەندە دەکرێت جبەخانەکەی تا ساڵی 2025 نزیکەی 170 سەری ئەتۆمی هەبێت.