وەزارەتی ناوخۆ: پێدانی ئیقامە تەنیا بۆ ئەوانەیە لە پڕۆژەکانی وەبەرهێنان خانوو یان شوقە دەکڕن

ئاڤا نیوز

بڕیاری وەزارەتی ناوخۆ بۆ پێدانی نشینگە بە کەسانی بیانی مەرجی هەیە، بەڕێوەبەری گشتیی دیوانی وەزارەتی ناوخۆش دەڵێت، دەبێت پشتگیری دەستەی وەبەرهێنانیان پێبێت.

چیرۆکی سەرەکی: بە مەبەستی دروست کردنی بازاڕ بۆ پڕۆژەکانی وەبەرهێنان، حکومەتی هەرێمی کوردستان ئیقامە بەو کەسانە دەدات کە خانوو یان شوقە لە پڕۆژەکانی نیشتەجێبوون دەکڕن.

لێدوانی فەرمی: د.هێمن میرانی، بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان، بە ئاڤا میدیای ڕاگەیاند: بەگوێرەی ڕێنماییەکان دەبێت کەسی بیانی خانوو یان شوقە لە پڕۆژەکانی وەبەرهێنان بکڕن، دواتر پشتگیری دەستەی وەبەرهێنان بۆ بەڕێوەبەرایەتی گشتیی نشینگە ببەن، بۆ ئەوەی ئیقامەیان پێ بدرێت.

بەڕێوەبەری گشتیی دیوانی وەزارەتی ناوخۆ وتیشی: ئەم بڕیارە ئەو کەسانە ناگرێتەوە کە خانوو یان شوقە لە دەرەوەی پڕۆژەکانی وەبەرهێنان دەکڕن، چونکە ئامانجی بڕیارەکە بۆ دروستکردنی بازاڕە بۆ پڕۆژەکانی وەبەرهێنان.

باکگراوند: لە مانگی شەشی ساڵی 2025، کۆبوونەوەیەکی هاوبەش لەنێوان دەستەی وەبەرهێنان و وەزارەتی ناوخۆی حکومەتی هەرێمی کوردستان لەسەر ڕاسپاردەی نووسینگەی سەرۆکوەزیران مەسرور بارزانی ئەنجامدرا، ئەمەش لەپێناو گەشەپێدان و بوژاندنەوەی زیاتری کەرتی وەبەرهێنان و ڕاکێشانی وەبەرهێنەری بیانی و پێدانی ڤیزا و نیشینگە بە وەبەرهێنەر و هاووڵاتیانی بیانی ئەم بڕیارانە درا.

یەکەم: پێدانی نیشینگەی وەبەرهێن بۆ ماوەی سێ بۆ پێنج ساڵ بە کەسی بیانی (خۆی و هاوسەر و منداڵی خوار 18 ساڵ و دایک و باوک)، لە کاتی کڕینی یەکەیەکی نیشتەجێبوون لە پڕۆژەکانی وەبەرهێنان، بەمەرجێک نرخی یەکەی نیشتەجێبوونەکە لە 50 هەزار دۆلار کەمتر نەبێت، ئەمەش بە پشتگیری دەستەی وەبەرهێنان.

دووەم: لە دوای کۆتایهاتنی ماوەی نیشینگەکەی بۆ هەمان ماوەی ئاماژەپێکراو بە هەمان ڕێکار درێژدەکرێتەوە.