بە ئامادەبوونی سەرۆکوەزیران یاری کۆتایی مۆندیالی تۆپی پێی بچووكراوەی خانمان کۆتایی هات

ئاڤا نیوز

ئێوارەی ئەمڕۆ بە ئامادەبوونی سەرۆکوەزیران مەسرور بارزانی، یاری کۆتایی مۆندیالی تۆپی پێی بچووكراوەی خانمان بەڕێوەچوو، هەڵبژاردەی خانمانی میسر نازناوەکەیان بردەوە.

چیرۆکی سەرەکی: یەکەمجارە پاڵەوانێیەتی مۆندیالی تۆپی پێی بچووککراوەی خانمان، لە هەرێمی کوردستان بەڕێوەبچێت، شەش هەڵبژاردە لە پاڵەوانیەتیەکە بەشداربوون  و بەسەر دوو کۆمەڵە دابەشکران، هەڵبژاردەکانی ( کوردستان، بەرازیل، میسر، لوبنان، ئوردن، پاکستان) بەشدارییان کردبوو، پاڵەوانێیەتییەکە ماوەی هەشت رۆژ لە شاری هەولێر بەردەوامبوو.

چی ڕوویدا: ئێوارەی ئەمڕۆ دووشەممە 22-9-2025، بە ئامادەبوونی سەرۆکوەزیران مەسرور بارزانی، لە هەولێر، یاریی كۆتایی مۆندیالی تۆپی پێی بچووكراوەی خانمان لەنێوان هەردوو هەڵبژاردەی بەڕازیل و میسر بەڕێوەچوو، لە ئەنجامدا هەڵبژاردەی خانمانی میسر، بووە پاڵەوانی مۆندیالی تۆپی پێی بچووكراوەی خانمان.

زانیاریی زیاتر: لە یاریی کۆتایی پاڵەوانێیەتیەکەدا لە یارییەکی بەهێزدا هەردوو هەڵبژاردەی میسر و بەڕازیل بە گۆڵێک بۆ هەردوولا یەکسان بوون و هەڵبژاردەی میسر توانی بە ئەنجامی لێدانی یەکلاکەرەوە بە ئەنجامی سێ گۆڵ بەرامبەر بە دوو گۆڵ یارییەکە بباتەوە و بووە پاڵەوانی ئەم نازناوە.

ئەمەش بزانە: هەڵبژاردەی لوبنان پلەی سێیەم و کوردستانیش پلەی چوارەمی بەدەستهێنا، لە کۆتاییشدا لەلایەن سەرۆکوەزیران مەسرور بارزانییەوە خەڵات بەسەر ناوبژیوان و یاریزان و تیپە سەرکەوتووەکان دابەشکرا.