عێراقچی: ئێران ئامادەیە بۆ ڕێگە چارەی دیپلۆماسی و بەرگری

ئاڤا نیوز

وەزیری دەرەوەی ئێران دووپاتیکردەوە، بەرنامەی ئەتۆمی وڵاتەکەی بۆ مەبەستی ئاشتییانە بەکاردێت بەڵام ئەگەر ڕووبەڕووبوونەوە ڕووبدات بە تووندی بەرگریی دەکەن.

وێنە گەورەکە: هەفتەی داهاتوو ئەو وادەیە کۆتایی دێت کە وڵاتانی ئەوروپی سەبارەت بە بەرنامە ئەتۆمییەکەی بۆ ئێرانیان دیاریکردبوو، ئەو وڵاتەش ڕەخنە لە هەنگاوەکەی وڵاتانی ئەوروپا گرت و بە پێشێلێکردنی یاسا نێودەوڵەتییەکان دەزانێت.

لێدوانی فەرمی: عەباس عێراقچی وەزیری دەرەوەی ئێران ڕایگەیاند، بەرنامە ئەتۆمییەکەمان بۆ مەبەستی ئاشتییانە بەکاردێت و ئێران وڵاتێکی ئاشتیخوازە. بەڵام، ئەگەر ڕووبەڕووبوونەوە ڕووبدات، بە تووندی بەرگری لە خۆمان دەکەین.

وتیشی، هەر هەنگاوێکی وێرانکەر لەلایەن سێ وڵاتە ئەوروپییەکەوە لە ئەنجوومەنی ئاسایشەوە، لەلایەن ئێرانەوە وەڵام دەدرێتەوە و قۆناغێکی نوێ لە پەیوەندییەکانیان لەگەڵ ئاژانسی نێودەوڵەتیی وزەی ئەتۆمی دروست دەکات، و ئێستا ئەو ساتەیە کە لایەنەکان دەبێت بڕیار بدەن، ئایا هاوکاری هەڵدەبژێرن یان ڕووبەڕووبوونەوە.