سەرۆكوەزیران بارزانی بۆ پلاسخارت: پێویستە ڕێز لە قەوارەی هەرێمی کوردستان بگیرێت

ئاڤا نیوز

 

سەرۆكوەزیران بارزانی، پێشوازی لە جینین پلاسخارت، نوێنه‌ری تایبه‌تیی سكرتێری گشتیی نه‌ته‌وه‌ یه‌كگرتووه‌كان له‌ عێراق کرد، بابەتی سەرەکیی کۆبوونەوەکە، گرنگیی ئەنجامدانی هەڵبژاردنی پەرلەمانی کوردستان بوو.

لێدوانی فەرمی: سەرۆكوەزیران بارزانی، وێڕای دووپاتکردنەوەی پشتیوانیی خۆی بۆ ئەنجامدانی هەڵبژاردن، ئاماژەی بەوە دا پێویستە هەڵبژاردن لە بارودۆخێکی ئاسایی و یاسایی و دوور لە پێشێلکاریی دەستووری و دەستوەردان و دیزاینی پێشوەختە ئەنجام بدرێت و ڕێز لە قەوارەی دەستووریی هەرێمی کوردستان و مافەکانی پێکهاتە نەتەوەیی و ئاینییەکانی کوردستانیش بگیرێت.

زانیاریی زیاتر: سەرۆكوەزیران بارزانی هەروەها جەختی لە گرنگیی ڕۆڵی کۆمەڵگەی نێودەوڵەتی لە چاودێریکردنی پرۆسەی هەڵبژاردن کردەوە بۆ ئەوەی بە شێوەیەکی پاک و بێگەرد بەڕێوە بچێت.

ئەوەی پێویستە بیزانیت: هەردوولا هاوڕابوون لەسەر نەهێشتنی کێشە و گرفتەکانی بەردەم هەڵبژاردن و گەیشتنی لایەنەکان بە چارەسەر لە پێناو پاراستنی پرۆسەی دیموکراسی و سەقامگیریی هەرێمی کوردستان.

وێنە گەورەكە: 18 ی ئاداری ئەمساڵ مەكتەبی سیاسی پارتی دیموكراتی كوردستان لە ڕاگەیێنراوێكدا ناڕەزایی لە شێوازی بەڕێوەچوونی هەڵبژاردنی پەرلەمانی كوردستان دەربڕی.