لە بەغدا چەند چەکدارێکی نەناسراو دوو کەس لەنێو ئۆتۆمبێلەکەیان دەکوژن

ئاڤا نیوز

لە هێرشێکی چەکدارییدا لە گەڕەکی سەیدییەی بەغدا، دوو کەس کوژران، سەرچاوەیەکی ئەمنییش وردەکاریی هێرشە چەکدارییەکە بۆ ئاڤا میدیا ئاشکرا دەکات.

چیرۆکی سەرەکی: بەیانی ئەمڕۆ  پێنجشەممە گرتە ڤیدیۆییەک لە تۆڕە کۆمەڵایەتییەکانی عێراقدا بڵاوبووەوە، کە تێیدا دەردەکەوێت ئۆتۆمبێلێکی ڕەش لە نزیک ئۆتۆمبێلێکی سپی لە یەکێک لە کۆڵانەکانی نیشتەجێبوون لە گەڕەکی سەیدییەی بەغدا نزیک دەبێتەوە. دواتر یەکێک لە سەرنشینانی ئۆتۆمبێلە ڕەشەکە تەقە لە سەرنشینانی ئۆتۆمبێلە سپییەکە دەکات.

زانیاریی بەدەستهاتوو: سەرچاوەیەکی ئەمنی ئەمڕۆ پێنجشەممە 25ـی ئەیلوولی 2025، بە ئاڤای ڕاگەیاند: "چەند چەکدارێکی نەناسراو کە لەناو ئۆتۆمبێلێکدا بوون، تەقەیان لە ئۆتۆمبێلێکی دیکە کرد لەناوچەی سەیدییە لە بەغدا، کە دوو کەسی تێدابوو، بەهۆیەوە هەردووکیان لە شوێنی ڕووداوەکە گیانیان لەدەستدا."

زانیاریی زیاتر: سەرچاوەکە جەختی لەوە کردەوە کە لایەنە ئەمنییەکان لێکۆڵینەوەیان لەبارەی ڕووداوەکەوە دەستپێکردووە و دوای هەڵاتنی چەکدارەکان بۆ شوێنێکی نادیار، گەڕان و پشکنین بۆ دۆزینەوەیان بەردەوامە.

ئەوەی پێویستە بیزانیت: ئامارەکان دەری دەخەن عێراق لە دوو ساڵی ڕابردوودا بەرزترین ڕێژەی تاوانی کوشتنی لەسەر ئاستی عەرەبی تۆمار کردووە، بە نزیکەی پێنج هەزار و 300 تاوان لە یەک ساڵدا.