ئەمەریکا و تورکیا واژۆ لەسەر یاداشتنامەی لێکتێگەیشتن بۆ وزەی ئەتۆمی ئاشتی دەکەن

ئاڤا نیوز

وەزیری وزە و سەرچاوە سروشتییەکانی تورکیا ڕایگەیاند، لەگەڵ وەزیری دەرەوەی ئەمەریکا واژۆیان لەسەر یاداشتنامەی لێکتێگەیشتن بۆ هەماهەنگیی وزەی ئەتۆمی بۆ ئاشتی کردووە.

چیرۆکی سەرەکی: لە دوای کۆبوونەوەکەی ئەمڕۆ 25ی ئەیلوولی 2025 دۆناڵد ترەمپ، سەرۆکی ئەمەریکا و ڕەجەب تەیب ئەردۆغان، سەرۆککۆماری تورکیا لە کۆشکی سپی کە دوو کاتژمێر و 20 خولەکی خایاند، بە ئامادەبوونی هەردووکیان؛ مارکۆ ڕوبیۆ، وەزیری دەرەوەی ئەمەریکا و ئاڵپئارسڵان بایراکتار، وەزیری وزە و سەرچاوە سروشتییەکانی تورکیا واژۆیان لەسەر یاداشتنامەکە کرد.

لێدوانی فەرمی: ئاڵپئارسڵان بایراکتار لە هەژماری فەرمیی خۆی لە تۆڕی کۆمەڵایەتیی ئێکس نووسیویەتی، قۆناغێکی نوێ بۆ بەهێزترکردنی هاوبەشییەتی تورکیا و ئەمەریکا لە بواری وزەی ئەتۆمی بۆ ئاشتی دەستی پێ کردووە و هیوای خواست ئەنجامدانی کارەکان بۆ جێبەجێکردنی ڕێککەوتنەکە بە سوودی هەردوو وڵات تەواو بێت. 

لە لایەکی دیکەوە: میدیاکانی نزیک لە ئاک پارتی ئاماژە بەوە دەکەن، چاوەڕێ دەکرێت لە ڕێگای ئەو پڕۆژانەی بۆ ڕێککەوتنەکە ئەنجام دەدرێن، هاوبەشییەتی ستراتیژی هەردوو وڵات لە زۆربەی بوارەکان هەر لە تەکنەلۆژیا و وزەوە تاوەکو وەبەرهێنان لە ژێرخاندا بەهێزتر ببێت.