وەزیری نەوت وردەکاریی هەناردەی نەوتی کوردستان ئاشکرا دەکات

ئاڤا نیوز

حەییان عەبدولغەنی، وەزیری نەوتی عێراق، وردەکاریی ڕێککەوتنی نێوان بەغدا و هەولێر سەبارەت بە دەستپێکردنەوەی هەناردەکردنی نەوتی کوردستان ئاشکرا کرد.

چیرۆکی سەرەکی: دوای ئەوەی حکومەتی هەرێمی کوردستان، حکومەتی فیدراڵی عێراق و کۆمپانیاکانی نەوت لەسەر دووبارە هەناردەکردنەوەی  نەوتی کێڵگەکانی کوردستان لە ڕێگەی تورکیاوە ڕێککەوتن، محەممەد شیاع سوودانی، سەرۆکوەزیرانی عێراق، ڕێککەوتنەکەی ڕاگەیاند و بە ڕێککەوتنێکی مێژوویی وەسفی کرد.

لێدوانی فەرمی: حەییان عەبدولغەنی، وەزیری نەوتی عێراق ڕایگەیاند: بۆ یەکەمجار دوای زیاتر لە 20 ساڵ، نەوتی بەرهەمهێنراو لە کێڵگە نەوتییەکانی هەرێمی کوردستان دەدرێت بە حکومەتی فیدراڵی بۆ هەناردەکردن.

حەییان عەبدولغەنی ئەمانەشی وت:

٠ بۆ یەکەمجار دوای زیاتر لە دوو ساڵ لە ڕاگرتنی، بۆری نەوتی عێراق - تورکیا دووبارە کارا دەکرێتەوە و هەناردەکردنی نەوتی کوردستان دەست پێدەکاتەوە.

٠ ڕۆژانە نزیکەی 180 بۆ 190 هەزار بەرمیل نەوت بە مەبەستی هەناردەکردن دەدرێت بە کۆمپانیای سۆمۆ.

٠ وەزارەتی نەوتی عێراق بەرپرسیارێتی شایستە داراییەکانی تایبەت بە بەرهەمهێنان، بەپێی هەموارکردنەوەی یاسای بودجە، لەبڕی وەزارەتی دارایی دەگرێتە ئەستۆ.

٠ هەناردەکردنی نەوت لە ڕێگەی بەندەرەکانی بەسرە دەگاتە 3.4 ملیۆن بەرمیل و ئەم بڕە نوێیەش لەڕێی بەندەری جەیهانی تورکییەوە زیاد دەکرێت.