بەڕێوەبەری سۆمۆ: ڕێککەوتنەکەمان لەگەڵ کوردستان درێژخایەنە و کۆتایی بە کێشەکان دەهێنێت

ئاڤا نیوز

بەڕێوەبەری گشتیی کۆمپانیای بەبازاڕکردنی نەوتی عێراق (سۆمۆ) ڕایگەیاند، سبەی شەممە هەناردەی نەوتی هەرێمی کوردستان لەڕێگەی بەندەری جەیهانی تورکیاوە دەستپێدەکاتەوە و سەرجەم ئاستەنگییەکانی بەردەم هەناردەکردنەوەی نەوت لابراون، دڵنیایشیدا کە ڕێککەوتنەکە گەرەنتی مافی سەرجەم هاووڵاتیانی کوردستان و عێراق دەکات.

وێنە گەورەکە: دوای چەندین مانگ دانوستان، حکومەتی کوردستان و عێراق لەگەڵ کۆمپانیا بەرهەمهێنەرەکانی نەوت گەیشتنە ڕێککەوتنێکی سێقۆڵی بۆ دەستپێکردنەوەی هەناردەی نەوتی هەرێمی کوردستان، بەگوێرەی ڕێککەوتنەکەش مافی کۆمپانیاکان گەرەنتی دەکرێت، قەرزەکانیان پێدەدرێتەوە و بۆ بەرهەمهێنانی هەر بەرمیلێک نەوتیش 16 دۆلاریان بۆ دیاری کراوە و لەبری پارە نەوتیان پێدەدرێت.

لێدوانی فەرمی: عەلی نزار، بەڕێوەبەری گشتیی کۆمپانیای بەبازاڕکردنی نەوتی عێراق (سۆمۆ) لە کۆنفرانسێکی ڕۆژنامەنووسیدا لە بەغدا، کە پەیامنێری ئاڤا میدیاش تێیدا ئامادە بوو، باسی لەوەکرد، ڕێککەوتنەکەیان دوای گفتوگۆی ڕاستەوخۆ بووە لەگەڵ کۆمپانیا بەرهەمهێنەرەکانی نەوت لە کوردستان و دڵنیاییان پێداون بۆ خەرجکردنی شایستە داراییەکانیان، لە قۆناغی یەکەمیشدا 16 دۆلار بۆ بەرهەمهێنانی هەر بەرمیلێک نەوت خەرج دەکرێت، ئەو پارەیەش لە هەژماری عێراق لە بانکی فیدراڵی ئەمریکا دادەنرێت لە بەرامبەریشدا بە هەمان بڕی پارە قەرەبووی وەزارەتی سامانە سرووشتییەکانی هەرێمی کوردستان دەکرێتەوە.

وتیشی، ئەم ڕێکارە کە لەگەڵ کۆمپانیا نەوتییەکانی کوردستان پەیڕەو کراوە ڕێکارێکی جیهانییە و لەگەڵ کۆمپانیاکانی باشووری وڵاتیش پەیڕەوی دەکەن تا ئەو کاتەی کۆمپانیای ڕاوێژکاری بڕی خەرجی بەرهەمهێنانی نەوت لە هەر کێڵگەیەکی نەوتی کوردستان بەجیا دەخەمڵێنێت، لەسەر ئەو بنەمایەش ڕایدەگەیەنن کە سبەی 27ـی ئەیلوول کاتژمێر 6:00ـی بەیانی دەست بە وەرگرتنی نەوتی کوردستان دەکەن و لەڕێگەی بەندەری جەیهانی تورکیاوە هەناردەی دەرەوەی دەکەن.

زانیاریی زیاتر: بەوتەی بەڕێوەبەری گشتیی سۆمۆ ڕێککەوتنەکە کاتی نابێت، بەڵکو دەبێتە سەرەتایەک بۆ ڕێککەوتنێکی درێژخایەن و هەمەلایەن لەسەر کۆی کایەی بەڕێوەبردنی وزە لەنێوان حکومەتی عێراق و حکومەتی کوردستان و کۆتاییهێنان بە کێشەکان، بەوەش وڵات خاوەن یەک کۆمپانیای نەوتی هەناردەکاری نەوت دەبێت و حکومەتیش دەتوانێت داهاتێکی ئەوتۆی بێتەدەست کە بتوانێت یاسای بودجەی ساڵانە وەک خۆیی و پابەندییەکانیشی بەرامبەر هاووڵاتیان لە سەرانسەری وڵاتدا جێبەجێ بکات.