سەرۆکی پەرلەمانی تورکیا: بڕیاری گوێگرتن لە ئۆجەلان لە دەسەڵاتی کۆمیسیۆنی ئاشتییە

ئاڤا نیوز

بەوتەی سەرۆکی پەرلەمانی تورکیا تا ئێستا لەو کۆمسیۆنە پەرلەمانییەی کە بۆ ئاشتی دروستکراوە باس لەوە نەکراوە گوێ لە سەرنج و پێشنیازەکانی ئۆجەلان بگیرێت. بڕیاری ئەمە لە دەسەڵاتی کۆمسیۆنەکەدایە.

وێنە گەورەکە: بە مەبەستی خێراترکردنی پرۆسەی ئاشتی لە تورکیا، ئەردۆغان دامەزراندنی کۆمیسیۆنێکی پەرلەمانی ڕاگەیاند و داوای لە هەموو پارتە سیاسیەکانی تورکیا کرد بەشدار بن لە کۆمیسیۆنەکە.

لێدوانی فەرمی: نومان کورتوڵموش، سەرۆکی پەرلەمانی تورکیا وتی، "تاوەکو ئێستا لە کۆبوونەوەکانی کۆمیسیۆنی یەکڕیزیی نیشتمانی، دیموکراسی و برایەتی باس لە گوێگرتن لە سەرنج و پێشنیازەکانی عەبدوڵڵا ئۆجەلان نەکراوە و بە دەنگی زیاتر لە نیوەی ئەندامانی کۆمیسیۆنەکە دەتواندرێت بڕیار لەوە بدرێت".

سەرۆکی کۆمیسیۆن ناتوانێت بە تەنیا ئەم بڕیارە بدات. ئێمە هیچ شتێک لە ڕای گشتیی تورکیا ناشارینەوە و جگە لە یەک کۆبوونەوە کە زیاتر پەیوەندی بە دۆخی ئەمنییەوە هەبووە، ناوەڕۆکی سەرجەم کۆبوونەوەکانمان ئاشکرا کردووە.

پێویستە ئەمەش بزانیت: ئەم وتانەی سەرۆکی پەرلەمانی تورکیا لە کاتێکدایە، بەردەوام بەرپرسانی دەم پارتی داوا دەکەن شاندێکی کۆمیسیۆنەکە سەردانی ئۆجەلان بکات و گوێ لە سەرنج و پێشنیازەکانی بگرێت بۆ سەرخستنی پرۆسەی ئاشتی و خودی ئەو پارتەش بە پێنج ئەندام لە کۆی 51 ئەندام لە کۆمیسیۆنەکەدا بەشدارە.

باکگراوند: ئەم کۆمیسیۆنە لە دوای چەکدانانی سیمبولی گرووپێک لە گەریلاکانی پەکەکە لە مانگی تەمموزی ئەمساڵ لە 2025-08-01 دامەزرێندرا و تاوەکو ئێستا 12 کۆبوونەوەی ئەنجام داوە. جگە لە ئیی پارتی، سەرجەم پارتە خاوەن فراکسیۆنەکان لە پەرلەمانی تورکیا (ئاکپارتی، جەهەپە، مەهەپە، دەم پارتی) و چەند پارتێکی دیکە بە چەند ئەندامێک بەشدارن لە کۆمیسیۆنەکە.