پارێزگای هەڵەبجە دەبێتە دەستە خوشکی شارێکی ئیسپانیا

ئاڤا نیوز

بە ئامانجی ئاڵوگۆری بازرگانی، گەشتیاری، کولتووری و وەرزشی، ئەکادیمی و کشتوکاڵی، پارێزگای هەڵەبجە و پارێزگای گرنیکای ئیسپانیا بوونە دەستەخوشکی یەکتری.

چیرۆکی سەرەکی: بەمەبەستی تەواوکردنی هەنگاوەکانی یاداشتی لەیەکتێگەیشتن لەنێوان پارێزگای (هەڵەبجە و گرنیکا) ڕۆژی هەینی 26-9-2025، دارەوان حاجی حامید، نوێنەری حکومەتی هەرێمی کوردستان لە ئیسپانیا، سەردانی پارێزگای گرنیکای کرد، لە کۆبوونەوەکەدا هەردوولا جەختیان لەخێراکردنی یاداشتی لەیەکتێگەیشتن و تەواوکردنی ڕێکارەکانی دەستەخوشکی هەر دوو شار کردەوە.

ڕاگەیێنراوی فەرمی: فەرمانگەی پەیوەندییەکانی دەرەوە، ڕایگەیاند، پارێزگاری گرنیکا، دەڵێت، دوای دیراسەکردنی ئەندامانی ئەنجوومەن و هەڵسەنگاندنی ورد، ئێمە بڕیارمانداوە کە لەگەڵتان کاربکەین تاکو هەردوو شار ببنە دەستەخوشکی یەکتر، ئەمەش بە ئامانجی ئاڵوگۆری، بازرگانی، گەشتیاری، کولتووری و وەرزشی، ئەکادیمی و کشتوکاڵ لەنێوان هەردوولا.

زانیاریی زیاتر: جەخت لە خێراکردنی یاداشتی لەیەکتێگەیشتن و تەواوکردنی ڕێکارەکانی دەستەخوشکی هەر دوو شار کرایەوە، دوای دانانی بەرنامەیەکی هاوبەش وا بڕیارە پارێزگاری گرنیکا ساڵی داهاتوو سەردانی هەرێمی کوردستان و پارێزگای هەڵەبجە بکات و دواتریش بۆ یادی ساڵانەی گرنیکا پارێزگاری هەڵەبجە بە سەردانێکی فەرمی بانگهێشتی گرنیکا بکرێت.