ڕاوێژکارێکی وەزارەتی ناوخۆ: ڕێبەری سەلامەتی ڕووداوەکانی ئاگرکەوتنەوە کەم دەکاتەوە

ئاڤا نیوز

بە ئامادەبوونی سەرۆکوەزیران مەسرور بارزانی، مەراسیمی ڕاگەیاندنی ڕێبەری سەلامەتی لە هەولێر بەڕێوەدەچێت و ڕاوێژکارێکی یاسایی وەزارەتی ناوخۆش ڕایدەگەیێنێت: بە جێبەجێکردنی ڕێبەرەکە ڕووداوەکانی ئاگرکەوتنەوە کەم دەبنەوە.

 
وێنە گەورەکە: حکومەتی هەرێمی کوردستان بەردەوام کار لەسەر بەرزکردنەوەی تواناکانی بەرگریی شارستانی کوردستان دەکات، بەمەش ئامێر و کەرەستەی پێویست و پێشکەوتوو دەخاتە بەردەم تیمەکانی فریاگوزاری لە سەرجەم پارێزگاکان، هەروەها کار لەسەر زیادکردنی توانای لۆجستی تیمەکانی ئاگر کوژێنەوە دەکات تاوەکو لە ڕووداوەکانی ئاگرکەوتنەوە بتوانن بە باشترین شێوە و بەبێ زیان کۆنتڕۆڵی بکەن. 

لێدوانی فەرمی: سامی جەلال، ڕاوێژکاری یاسایی لە وەزارەتی ناوخۆ بە ئاڤای ڕاگەیاند: ڕێبەری سەلامەتی، ڕێبەرێکی هونەرییە و نزیکەی چوار ساڵ و نیوە لیژنەیەکی تایبەتی وەزارەتی ناوخۆ خەریکی ئامادەکردنین، ئامانج لێی مسۆگەرکردنی ژیانی هاونیشتمانیانە بەپێی ستانداردە جیهانییەکان. 

زانیاریی زیاتر: پێویستە هەموو لایەک ڕێکارەکانی خۆپارێزی بەکاربهێنن، بە تایبەت لە چۆنیەتی دروستکردنی باڵەخانە و شوینە گشتی و دووکانەکانیشدا، دوای ئەوەش هەڵمەتێکی فراوان بۆ ئاشناکردنی هاووڵاتیان بە ڕێبەرەکە دەستپێدەکەین. ئێمە ستانداردێکی یەکگرتوومان داناوە و پێشبینی دەکەین خۆپارێزی بچێتە ئاستیکی بەرزەوە، بۆیە دەبێت هەموو شوینەکان پابەندی ئەم ڕێبەرە بن، چونکە ڕووداوەکانی ئاگرکەوتنەوە کەم دەکاتەوە.