بەهۆی لەبەرکردنی جلی کوردیی ڕەنگ خاکی سزای 4 مانگ بەندکردن بەسەر گەنجێک سەپێندرا

ئاڤا نیوز

دەستگیرکردنی هاووڵاتییانی کورد لە ڕۆژهەڵاتی کوردستان و ئێران بە تۆمەتی لەبەرکردنی جلی خاکیی کوردی بەردەوامە، لە نوێترین پێشهاتیشدا گەنجێکی کورد بە چوار مانگ زیندانیکردن سزا دەدرێت.

چیرۆکی سەرەکی: عەلی دانشی، هاووڵاتیی کورد و خەڵکی شاری مەھاباد لەلایەن دەزگای دادوەریی کۆماری ئیسلامیی ئێران بەهۆی لەبەرکردنی جلوبەرگی خاکیی کوردی، سزای چوار مانگ بەندکرانی بەسەردا سەپێندرا.

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند: عەلی دانشی لە لایەن لقی یەکی دادگای شۆڕشی ئەو شارە بەهۆی لەبەرکردنی جلوبەرگی کوردیی خاکی و جامانە لە ڕێوڕەسمی زەماوەندێک، سزای چوار مانگ بەندکرانی هەڵپەسێردراوی بەسەردا سەپێندرا، بەدانانی بارمتەی دوو ملیار و 500 ملیۆن تمەن و بەشێوەی کاتی هەتا کاتی کۆتاییهاتنی پرۆسەی دادگاییکردنەکەی ئازاد کراوە.

زانیاریی زیاتر: لە ماوەی ڕابردوو 58 هاووڵاتیی دیکەی کورد لە ڕۆژهەڵاتی کوردستان کە دانیشتووی مەهاباد، بۆکان، پیرانشار و شنۆ بوون، بە تۆمەتی لەبەرکردنی جلی کوردییەوە سزای سێ مانگ زیندانیکردنیان بەسەردا سەپێندرا.

ئەمەش بزانە: لەم ساڵانەی دوایی جلی کوردی بە ڕەنگی خاکی لەناو بەشێک لە گەنجانی ڕۆژهەڵاتی کوردستان بووەتە باو، ئەمەش بەهۆی ئەوەی ئەم جۆری جلوبەرگە لەلایەن بەشێکی زۆری لە هێزە ئۆپۆزسیۆنەکانی ڕۆژهەڵاتی کوردستان دەپۆشرێت.

باکگراوند: عەلی دانشی بەرەبەیانیی ڕۆژی هەینی 5-9-2025، لە لایەن هێزەئەمنییەکانی ئێران و بە بەکارھێنانی توندوتیژی و لێدانەوە دەستبەسەر کراوە.