عێراق ئامادەکاری بۆ دانوستان لەگەڵ تورکیا لەبارەی دابینکردنی ئاو دەکات

ئاڤا نیوز

سێ وەزیری حکومەتی عێراق لە میانی کۆبوونەوەیان، بڕیاریاندا دەست بە دانوستان بکەن لەگەڵ تورکیا لەپێناو دابینکردنی ئاوی پێویست ئەوەش تەنیا بۆ ماوەی دوو مانگ.

چیرۆکی سەرەکی: کۆبوونەوەیەکی ڕاوێژکاری سێ قۆڵی لەنێوان عەباس مالیکی، وەزیری کشتوکاڵ ، عۆن زیاب، وەزیری سەرچاوەکانی ئاو و هەڵۆ عەسکەری، وەزیری ژینگە کرا، تێیدا کۆمەڵێک "پرسی گرنگ" تاوتوێ کران، "لە سەرووشیانەوە دەستەبەرکردنی ئاوی خواردنەوە و بەکارهێنانی مرۆیی، هاوکات پاراستنی باری ژینگەیی ڕووبارەکان و ڕێگریکردن لە پیسبوونیان و گفتوگۆکردن لەسەر پلانی کشتوکاڵی بۆ وەرزی زستان.

ڕاگەیێنراوی فەرمی: وەزارەتی کشتوکاڵ ڕایگەیاند: کۆمەڵێک بڕیار درا، گرنگترینیان بەخێرایی دەستپێکردنی دانوستانەکان لەگەڵ تورکیای دراوسێ بۆ بەردانی ئاو لەپێناو دابینکردنی پێداویستی ئاوی عێراق لە ماوەی مانگەکانی 10 و 11، بەگوێرەی ڕاگەیێنراوەکە، جەخت لەسەر پابەندبوونێکی ڕژد کراوەتەوە بۆ پاراستنی ژینگە بە هاوکاری لەگەڵ حکومەتە خۆجێیەکان، پرسی شیرینکردنی ئاوی دەریا و وێستگەکانی پاککردنەوەی ئاویش خرانە بەرباس.

ئەوەی پێویستە بیزانیت: لە مانگی تەمموزی ئەمساڵ، وەزارەتی سەرچاوەکانی ئاوی عێراق پشتڕاستی کردەوە کە کەمی بەردانی ئاوی ڕووبارەکان لە وڵاتانی سەرچاوەوە و کاریگەری گۆڕانی کەشوهەوا بووەتە هۆی دابەزینی بەرچاوی یەدەگی ئاو، ئاماژەی بەوەشکرد، ساڵی 2025 وشکترین ساڵەکانە لەم ڕووەوە لە ساڵی 1933ـەوە.