وەزیری بەرگریی عێراق سرووشتی داهاتووی پەیوەندییەکانی نێوان بەغدا و واشنتن ڕوون دەکاتەوە

ئاڤا نیوز

وەزیری بەرگریی عێراق، سرووشتی داهاتووی پەیوەندییەکانی نێوان بەغدا و واشنتن ڕوون دەکاتەوەو ئاماژە بۆ ئەوە دەکات "بووژانەوەی سوپای عێراق" هۆکار بووە بۆ هەڵسەنگاندنەوەی پەیوەندییەکان لەگەڵ هاوپەیمانی نێودەوڵەتی.

ئەوەی پێویستە بیزانیت: بەپێی ئەو ڕێککەوتنەی ساڵی ڕابردوو 2024 لە نێوان هەردوو لایەنی عێراقی و ئەمریکی واژۆ کرا، قۆناغی یەکەمی کشانەوەی هێزەکانی ئەمریکا و هاوپەیمانیی نێودەوڵەتیی دژی داعش، لە ئەیلوولی 2025 کۆتایی دێت، قۆناغی دووەمیش لە ساڵی 2026 کۆتایی دێت، بۆ  ماوەی ئەو ساڵەش ژمارەیەک هێزی لە هەرێمی کوردستاندا دەهێڵێتەوە.

لێدوانی فەرمی: سابت عەباسی، وەزیری بەرگریی عێراق لە لێدوانێکدا بە ڕۆژنامەی "شەرقولئەوسەت"ـی ڕاگەیاند، پەیوەندییەکان لە چوارچێوەی ڕێککەوتننامەی ستراتیژی نێوان هەردوو وڵاتدا بەردەوام دەبن، بەتایبەتی لە بوارەکانی بەرەنگاربوونەوەی تیرۆر، ڕاهێنان، پەرەپێدانی توانا سەربازییەکان و دابینکردنی چەک و تەقەمەنی.

لەهەمان کاتدا: بەگوتەی عەباسی، عێراق و ئەمریکا پابەند دەبن بە پەرەپێدانی تواناکانی عێراق لە بوارەکانی ئاسایش و بەرگری، قووڵکردنەوەی هاوکاری ئەمنی دوو قۆڵی لە هەموو بوارەکاندا، لەوانەش شکستهێنانی داعش و هەوڵەکانی هاوکاری ئەمنی هەرێمی.

لەلایەکی دیکەوە: وەزیری بەرگریی عێراق جەختی لەسەر بەردەوامیدان بە هاوکاری بۆ دابینکردنی پارچەی یەدەگ و بەردەوامی کەرەستە سەربازییە ئەمریکییەکان کردەوە و ئاماژەی بەوەدا، پەرەپێدانی سیستمی بەرگریی ئاسمانی و چارەسەرکردنی کەموکوڕییەکانی ڕابردوو لەم بوارەدا لە پێشینەی کارەکانی وەزارەتەکەیانە.