پێشمەرگە و سوپای عێراق بۆ نەهێشتنی جموجۆڵی داعش هەماهەنگی دەکەن

ئاڤا نیوز

بە مەبەستی نەهێشتنی جموجۆڵەکانی داعش و دابینکردنی ئاسایش و ئارامی بۆ ناوچەکە، لە خانەقین کۆبوونەوەیەکی هاوبەش لەنێوان پێشمەرگە و سوپا و هێزە ئەمنییەکانی عێراق بەڕێوەچوو.

وێنە گەورەكە: بەهۆی بوونی بۆشایی ئەمنییەوە زۆرجار شانە نووستوەکانی چەكدارانی داعش لەناوچە کێشە لەسەرەکانی دەرەوەی ئیدارەی هەرێمی كوردستان، جموجۆڵیان هەبووە، هەربۆیە هێزەکانی پێشمەرگە و سوپای عێراق چەندین جار هەماهەنگیی یەکتریان کردووە و ئۆپەراسیۆنی سەربازییان بۆ ئەو ناوچانەی گومانی مۆڵگە و حەشارگەی تیرۆرستانیان لێدەکرێت ئەنجام داوە.

ڕاگەیێنراوی فەرمی: وەزارەتی پێشمەرگە ڕایگەیاند، ئەمڕۆ 29-9-2025، بە ئامادەبوونی جێگری میحوەری 6ی هێزەکانی پێشمەرگە، فەرماندەی فیرقەی 6ی پیادەی وەزارەتی پێشمەرگە، فەرماندەی فیرقەی 1ی پیادەی سوپای عێراق، ئەفسەرانی هێزەکانی پێشمەرگە و سوپای عێراق و هێزە ئەمنییەکانی دیکە لە ناوچەکە، لە بنکەی هەماهەنگیی هاوبەشی خانەقین کۆبوونەوەیەکی هاوبەش لەنێوان هێزەکانی پێشمەرگە و هێزە ئەمنییەکانی عێراق بەڕێوەچوو.

لە کۆبوونەوەکەدا گفتوگۆ لەبارەی زیاتر بەرەوپێشبردنی هەماهەنگی و کاری هاوبەش لەنێوان هێزەکانی پێشمەرگە و سوپا و هێزە ئەمنییەکانی عێراق لە ناوچەکە، بە مەبەستی نەهێشتنی جموجۆڵی تیرۆریستان و دابینکردنی ئاسایش و ئارامی زیاتر بۆ هاووڵاتیانی ناوچەکە کرا.