زانکۆی پۆلیتەکنیکی هەولێر ژمارەیەک بەشی نوێ دەکاتەوە

ئاڤا نیوز

زانکۆی پۆلیتەکنیکی هەولێر، بۆ ساڵی نوێی خوێندن ژمارەیەک بەشی زانستیی نوێ دەکاتەوە و قوتابییانی دەرچووی پۆلی 12 دەتوانن داواکاری پێشکەش بکەن. 

وێنە گەورەکە: لەسەر بنەمای پێداوسیتی بازاڕ بۆ دەستی کاری ئەکادیمی جیاواز و لەگەڵ گەشەسەندنی بەردەوام و پێشکەوتنەکان زانکۆ و پەیمانگا حکومییەکانی هەرێمی کوردستان ژمارەیەک بەش و کۆلێژی نوێیان کردووەتەوە، دەرچووانی پۆلی 12ی ئامادەیی دەتوانن بۆ ئەمساڵی خوێندن داوکاری وەرگرتن پیشکەشی ئەم بەشە نوێیانە بکەن.

لێدوانی فەرمی: پرۆفیسۆر دکتۆر ئیدریس محەممەد تاهیر هەرکی، سەرۆکی زانکۆی پۆلیتەکنیکی هەولێر گوتی: بۆ یەکەمجارە لەسەر ئاستی هەرێمی کوردستان ژمارەیەک بەشی نوێیمان کردووەتەوە، ئەو بەشە نوێیانە بەپێی پێداویستی بازاڕ و گەشەپێدانی بەردەوام کراونەتەوە.

زانیاریی زیاتر: بەشە نوێیەکانی زانکۆی پۆلیتەکنیکە هەولێر ئەمانەن: 

-    بەشی تەکنیکی تەلارسازی و باخچەکان لە کۆلێژی تەکنیکی ئەندازیاری

-    بەشی تەکنیکی ئەندازیاری خزمەتگوزاری باڵەخانەکان لە کۆلێژی تەکنیکی ئەندازیاری

-    بەشی هایدرۆپۆنیک لە پەیمانگای تەکنیکی خەبات، ئەم بەشە تایبەتە بە کشتوکاڵ کردن بە بەکارهێنانی کەمترین بڕی ئاو لەسەر ڕووبەرێکی دیاری کراوی زەوی کشتوکاڵی.

-    بەشی ڕاگەیاندنی بازرگانی لە پەیمانگای تەکنیکی سۆران

-    بەشی دڵنیایی لە پەیمانگای تەکنیکی کارگێڕی هەولێر

-    بەشی دەرمانسازی گیایی لە پەیمانگای تەکنیکی مێرگەسۆر(ئەم بەشە ساڵی ڕابردوو کراوەتەوە بەڵام ئەمساڵ ناوی گۆڕاوە و تاقیگە و پێداویستی بۆ دابین کراوە) 

بۆچی گرنگە: ئەو بەشانە هەلی وەرگرتنی قوتابیان لە کۆلێژ و پەیمانگا حکومییەکان زیاتر دەکات.

بابەتە ستراتیژییەکان: کردنەوەی بەشی زانستی جیاواز دەستی ئەکادیمی و شارەزا لەبواری پسپۆڕی جیاواز بۆ بازاڕی کار ئامادە دەکرێت.

ئەوەی ئێستا ڕوودەدات: دەرچووانی پۆلی 12ی ئامادەیی دەتوانن داواکاری وەرگرتن بۆ بەشە نوێیەکانی زانکۆی پۆلیتەکنیکی هەولێر پێشکەش بکەن، چونکە ئەو بەشانە لە سیستمی زانکۆڵاین جێگیرکراون.

ئەمەش بزانە: زانکۆی پۆلیتەکنیکی هەولێر پێکهاتووە لە حەوت کۆلێژ و شەش پەیمانگا، کە 84 بەشی زانستییان لەخۆگرتووە و کەوتوونەتە سەنتەری شاری هەولێر و قەزاکانی سنووری پارێزگای هەولێر و سنووری ئیدارەی سەربەخۆی سۆران.