ئەمریکا پێداچوونەوە بە جێگیرکردنی هێزەکانی لە عێراق دەکات

ئاڤا نیوز

 

بەرپرسێکی باڵای ئەمریکا ڕایدەگەیێنێت، ئیدارەی دۆناڵد ترەمپ لە داهاتوویەکی نزیکدا بڕیاری جێگیرکردنەوەی هێزەکانی وڵاتەکەی لە عێراق ڕادەگەیەنێت.

 

ئەوەی پێویستە بیزانیت: واشنتن و بەغدا گەیشتوونەتە ڕێککەوتنێک لەسەر پلانێک بۆ کشانەوەی هێزەکانی هاوپەیمانێتیی نێودەوڵەتی بە سەرۆکایەتیی ئەمریکا لە عێراق. ڕاپۆرتەکان ئاماژە بەوە دەکەن کە سەدان سەرباز تا مانگی ئەیلوولی 2025 دەکشێنەوە و ئەوانی دیکەش تا کۆتایی ساڵی 2026.

 

زانیاریی بەدەستهاتوو: کەناڵی "جەزیرە"ی قەتەری لە زاری بەرپرسێکی ئەمریکییەوە ڕایگەیاند، "ئەم گۆڕانکارییە لە چوارچێوەی ئەو ستراتیژییەتەدایە کە ئیدارەی ترەمپ بۆ عێراق و ناوچەکە دایناوە. جێگیرکردنەوەی هێزەکانمان لەگەڵ لەپێشینەی ستراتیژیی ئیدارەی ترەمپ لە عێراق و ناوچەکەدا دەگونجێت."

 

لەلایەکی دیکەوە: پیت هێگسەس، وەزیری جەنگی ئەمریکا، لە وتارێکدا لە بنکەی سەربازیی کوانتیکۆ بە ئامادەبوونی فەرماندەکانی سوپای ئەمریکا ڕایگەیاند، "یەکەم ئەرکی ئێمە لە وەزارەتی جەنگدا ئامادەباشی دەبێت بۆ جەنگ و خۆئامادەکردن بۆ سەرکەوتن بەبێ کەمتەرخەمی و بێهوودەیی."

 

زانیاریی زیاتر: هەر بەگوێرەی ئەو سەرچاوەیە،  ئیدارەی ترەمپ ماوەی چەند مانگێک بوو تاوتوێی ئەگەری کشانەوەی بەشێکی زۆری هێزەکانی ئەمریکای لە عێراق دەکرد، لە بەرامبەردا هێشتنەوەی ژمارەیەکی کەم لە هێزەکانی لە عێراق بۆ بەرەنگاربوونەوەی تیرۆر.