حەماس وەڵامی پلانی ترەمپ بۆ ئاشتی دەداتەوە

ئاڤا نیوز

بەگوێرەی سەرچاوەیەک کە قسەی بۆ میدیایەکی ئەمریکا کردووە، پێشبینی دەکرێت ئەمڕۆ بزووتنەوەی حەماس وەڵامی پلانە 20 خاڵییەکەی دۆناڵد ترەمپ بداتەوە کە بۆ کۆتاییهێنان بە جەنگی غەززە پێشنیازی کردبوو.

 

چیڕۆکی سەرەکی: جەنگی غەززە لە دووەم ساڵی نزیک دەبێتەوە و هەوڵەکانی ئەمریکا بۆ ڕاگرتنی شەڕەکە چرتڕبوونەتەوە، ئێستا پلانی ئاشتیی ترەمپ کە ناسراوە بە "پلانی 20 خاڵ''ـی وەک گرنگترین هەوڵ تا ئێستا بۆ کۆتاییهێنان بە جەنگەکە سەیر دەکرێت.

 

بڵاوکراوەی فەرمی: کەناڵی سی بی سی نیوز لە زاری سەرچاوەیەکی ئاگادارەوە لە بزووتنەوەی حەماس ڕایگەیاندووە، ''حەماس ڕۆژی چوارشەممە وەڵامی خۆیان پێشکەش بە نێوەندگرانی میسر و قەتەر دەکەن.''

 

ئەوەی لەبارەیەوە دەگوترێت: لە کاتێکدا حەماس خوێندنەوە بۆ پلانەکە دەکات سەرچاوەکان دەڵێن، پێدەچێت بزووتنەوەکە چەندین ڕەخنەی لە پلانەکە هەبێت، لەبەرامبەردا بەرپرسێکی باڵای ئیسرائیل ئاشكرای کردووە، پلانەکە دانوستانی لەسەر ناکرێت و حەماس وەڵامی دەبێت ''بەڵێ یان نەخێر '' بێت.

 

بۆچوونی لایەنی بەرامبەر: دۆناڵد ترەمپ، سەرۆکی ئەمریکا وتویەتی، چاوەڕێی پەسەندکردنی پلانەکەین لەلایەن حەماسەوە، دەشڵێت 3-4 ڕۆژیان لەبەردەستە بۆ وەڵامدانەوە، هۆشداریشی دا کە ئەگەر حەماس وەڵامی پلانەکە نەداتەوە، ئەوا کۆتاییەکی ناخۆش دەبێت.