لیستی مووچەی مانگی نۆ درایە بەغدا

ئاڤا نیوز

 

لیستی مووچەی مانگی نۆی مووچەخۆرانی هەرێمی کوردستان ڕادەستی وەزارەتی دارایی حکومەتی فیدراڵ کرا.

 

وێنە گەورەکە: دوای ڕێککەوتنی نێوان هەولێر و بەغدا لەسەر هەناردەکردنەوەی نەوتی کوردستان بۆ بەندەری جیهان و ناردنی داهاتی نانەوتی بۆ بەغدا، خەرجکردنی مووچەی مانگی حەوت و مانگەکانی دواتر هیچ گرفت و بەربەستێکی لەبەردەمدا نەماوە،  لەم چوارچێوەیەدا وەزارەتی دارایی و ئابووریی هەرێمی کوردستان، دوای یەک ڕۆژ لە خەرجکردنی مووچەی مانگی حەوت لەلایەن بەغدا، ئەمڕۆ لیستی مووچەی مانگی نۆی ڕادەستی بەغدا کرد، پێشتریش لیستی مووچەی مانگی هەشتی ڕادەست کردبوو.

 

ڕاگەیێنراوی فەرمی: وەزارەتی دارایی و ئابووریی حکومەتی هەرێمی کوردستان ڕایگەیاند، ئەمڕۆ چوارشەممە 1-10-2025، لیستی مووچەی مانگی نۆی فەرمانبەران و مووچەخۆرانی هەرێمی کوردستان لەلایەن تیمی تەکنیکی وەزارەتی دارایی و ئابووریی هەرێمی کوردستانەوە ڕادەستی فەرمانگەی ژمێریاریی وەزارەتی دارایی حکومەتی فیدراڵ کرا.

 

زانیاریی تایبەت: پێشتر سەرچاوەیەکی تایبەت قسەی بۆ ئاڤا میدیا کردبوو، ئاڤا لە زاری ئەو سەرچاوەیەوە ڕایگەیاندبوو کە ڕۆژی سێشەممە 29-9-2025 وردبینیکردن لە لیستی مووچەی مانگی نۆ تەواو بووە، ئەمڕۆ چوارشەممە ڕادەستی بەغدا کرا.

 

ئەوەی پێویستە بیزانیت: ڕۆژی سێشەممە 30-9-2025، بانکی ناوەندیی عێراق بڕی 956 ملیار و 928 ملیۆن دیناری بە یەک گوژمە بۆ مووچەی مانگی حەوت خستە سەر هەژماری وەزارەتی دارایی و ئابووریی هەرێمی کوردستان لە لقی هەولێری بانکی ناوەندی. 

 

لەلایەکی دیکەوە: ئەمڕۆ وەزارەتی دارایی و ئابووری خشتەی مووچەی مانگی تەممووزی فەرمانبەران و مووچەخۆرانی هەرێمی کوردستانی بڵاوکردەوە و تیایدا ئاماژەی بۆ ئەوە کردووە، "ڕۆژی پێنجشەممە 2-10-2025 دەست بەدابەشکردنی مووچەی مانگی حوزەیرانی فەرمانبەران و مووچەخۆرانی هەرێمی کوردستان دەکرێت و ڕۆژی یەکشەممە 5-10- 2025 کۆتایی بەدابەشکردنی مووچە دێت".