ئەمریکا لەبارەی سزای لەسێدارەدان بەسەر ژنە چالاکوانێکی کورد لە ئێران هاتە دەنگ

ئاڤا نیوز

وەزارەتی دەرەوەی ئەمریکا بە تووندی ئیدانەی زیندانیکردن و سزای لەسێدارەدانی پەخشان عەزیزی، ژنە چالاکوانی کوردی کرد کە لە ئێراندا دەستگیرکراوە. هاوکات، پەرلەمانی ئیتاڵیا مافی هاوڵاتیبوونی فەخری بە هەر سێ ژنە چالاکوانی کورد، پەخشان عەزیزی، وەریشە مورادی و شەریفە موحەممەدی بەخشی.

ڕاگەیێنراوی فەرمی: وەزارەتی دەرەوەی ئەمریکا لە ڕاگەیێنراوێکدا ڕایگەیاندووە: "پەخشان عەزیزی لە دادگایەکی ساختەی ئێراندا سزای لەسێدارەدانی بۆ دەرچووە، دەبێ سزاکەی رابگیرێت." ئەمریکا نیگەرانی خۆی دەربڕیوە لەبارەی ئەوەی کە پارێزەرەکەی پەخشان عەزیزی ناتوانێت بیبینێت و ناوبراو لە ژوورێکی تاکەکەسی لە زیندانی ئەڤینی تاران ڕاگیراوە. داواشکراوە، "دەستبەجێ زیندانیانی سیاسی ئازاد بکرێن و کۆتایی بە هەڵمەتی تیرۆرکردنی خەڵکی ئێران بهێنن."

لە لایەکی دیکەوە: پەرلەمانی ئیتاڵیا لە هەنگاوێکی سیمبولیدا، مافی هاووڵاتیبوونی فەخری بە هەر سێ ژنە چالاکوانی کوردی بەخشی کە لە ئێراندا سزای لەسێدارەدانیان بۆ دەرچووە: پەخشان عەزیزی، وەریشە مورادی و شەریفە موحەممەدی. ئەم سێ چالاکوانە بەهۆی چالاکییەکانیان لە پێناو بەرگری لە ئازادییەکان و مافی مرۆڤ لە ئێراندا دەستگیرکراون و لە ئێستادا لە زیندانەکانی ئێراندا ڕاگیراون.