دۆناڵد ترەمپ هەڕەشەیەکی تووند ئاراستەی حەماس دەکات و دوا مۆڵەتیشیان پێدەدات

ئاڤا نیوز

دۆناڵد ترەمپ، سەرۆکی ئەمریکا لە پەیامێکی توونددا، حەماسی بە "هەڕەشەیەکی دڕندە و تووندوتیژ بۆ ڕۆژهەڵاتی ناوەڕاست" وەسف کرد، بە تایبەتی ئاماژەی بە کۆمەڵکوژیی حەوتی ئۆکتۆبەر کرد کە حەماس لە کۆمەڵگەیەکی جوونشین ئەنجامیدا.

وێنە گەورەکە: بۆ وەستانی جەنگ لە غەززە و ئازادکردنی بارمتەکان، ترەمپ پلانێکی 20 خاڵی ڕاگەیاند. حەماس داوایان کردبوو وادەی ڕەزامەندیان لەسەر پلانی ئاشتی غەززە بۆ درێژبکەنەوە و ترەمپیش دوا وادەی بۆ دیاریکردن.

بڵاوکراوەی فەرمی: دۆناڵد ترەمپ، سەرۆکی ئەمریکا لە تۆڕی تروس سۆشیاڵ ڕایگەیاند، چەندین ساڵە حەماس ‌هەڕەشە بووە بۆ ڕۆژهەڵاتی ناوەڕاست و ئەوان خەڵکیان کوشتووە و ژیانیان سەختکردووە و زیاتر لە 25 هەزار چەکدارییان کوژراون و زۆربەی ئەوانەی ماونەتەوە گەمارۆدراون و لە ڕووی سەربازییەوە کەوتوونەتە داوەوە، تەنیا چاوەڕێی ئەوەن کە وشەی بڕۆیان پێبڵێم بۆ ئەوەی ژیانیان بە خێرایی کۆتایی پێبێت. سەبارەت بەوانی تر، ئێمە دەزانین لە کوێن و کێن، و ڕاو دەکرێن و دەکوژرێن.

ترەمپ لە پەیامەکەی ئەمانەشی وتووە:

٠ داوا لە هەموو فەڵەستینییە بێتاوانەکان دەکەم دەستبەجێ ئەم ناوچەیەی کە ئەگەری مردنی گەورەی داهاتووی لێیە بەجێبهێڵن بۆ بەشە سەلامەتترەکانی غەززە.

٠ پلانەکەم کە هەموو لایەنەکان قبووڵیان کردووە ژیانی هەموو چەکدارانی ماوەی حەماس دەپارێزێت و ئەوە ڕێککەوتنێکی گەورەیە بۆ هەمووان. و تووندوتیژی و خوێنڕێژی دەوەستێت. ئێستا بارمتەکان ئازاد بکرێن، هەموویان،  تەرمی ئەوانەشی مردوون.

٠ دەبێت تا ئێوارەی ڕۆژی یەکشەممە کاتژمێر 6 بە کاتی واشنتن حەماس ڕێککەوتنەکە قبووڵ بکات، ئەگەر ئەم ڕێککەوتنە نەگەیشتە ئەنجام کە دوایین دەرفەتە، ئەوا دۆزەخێکی گەورە، کە هیچ کەسێک پێشتر نەیبینیوە، بەسەر حەماسدا دەکرێتەوە.