چۆن هزری منداڵەكانت بەهێز دەكەیت؟

ئاڤا دیجیتاڵ

گرنگیدان بە گەشەی جەستە و مێشك و هزری منداڵ لە قۆناغەكانی سەرەتای گەشەیدا زۆر پێویستە، پزیشكێكی پسپۆڕی منداڵان چەند ڕێیەكی خستووەتەڕوو، لەڕووی زانستی تەندروستییەوە منداڵەكەت سوودی لێ وەردەگرێت.

بابەتەكە بۆچی گرنگە: مانەوەی منداڵ بە تەندروستییەكی باش لەڕووی "جەستەیی و هزرییەوە" بە گرنگترین كار لەلای دایكان و باوكان دادەنرێت، بەو مەبەستەی نەوەیەكی تەندروست باش و بەهێز بۆ كۆمەڵگە گەورە بكەن.

لێدوانە فەرمییەكان: د. محەمەد حەسەن پسپۆڕی نەخۆشییەكانی منداڵان و گەشەی منداڵ، بۆ ئاڤا میدیا گوتی: گەشەی هزریی واتە پێگەیشتنی منداڵ لەڕووی هزر و بیر و فراوانبوونی ئاسۆی بیركردنەوەی منداڵ، بۆیە بایەخدان بە گەشەپێدانی هزریی منداڵ دەكرێ گۆڕانكاریی ڕیشەیی لە منداڵەكەدا بەدی بهێنێت، زۆر گرنگە باوك و دایك، مامۆستا و كۆمەڵگە چاودێریی تەواو لەسەر منداڵ دابنێت بۆ ئەوەی لەڕووی هزرەوە گەشەیەكی تەواو بكات.

ئەوەی پێویستە بیزانیت: بەگوێرەی توێژینەوەكان و بەدواداچوونەكان، ئەم پزیشكە چەند خاڵێكی دیاریكردووە پێویستە پەیڕەو بكرێن، بەمەبەستی گەشە و بەهێزبوونی هیزری منداڵ: 

یەكەم: زۆر قسە لەگەڵ منداڵەكەت بكە بەر لەوەی بگاتە دەستپێك و گەیشتی بە قۆناغی قوتابخانە، بە مەبەستی نەبوونی ترس لە قسەكردندا.

دووەم: زۆر بیدوێنە و كتێبی بۆ بخوێنەوە، بۆ ئەوەی بیركردنەوەكانی فراوانتربن.

سێیەم: بە ئارامی وەڵامی پرسیارەكانی بدەرەوە و لەكاتی وەڵامدانەوەدا بێزاریی دەرمەبڕە و لێی تووڕە مەبە.

چوارەم: ئەگەر ویستی شتێك بڵێت، لێیگەڕێ با بەو شێوەیەی توانای هەیە دەریببڕێت، كەی زانیت هەڵەبوو بە تۆنێكی ئارام ڕاستییەكەی پێ بڵێ.

پێنجەم: بێ دەربڕین و قسەكردن شتەكانی مەخەنە بەر دەست منداڵەكەت، بۆ نموونە گەر بە ئاماژە گوتی "بووكەڵەكەم" وای لێ بكە بەشێوازی قسەكردن بڵێ "بووكەڵەكەم" ئەو كات بیدەرێ.

 

كاریگەری و لێكەوتەكان: ئەگەر بە پێچەوانەی ئەم ڕێنماییانە هەڵسوكەوت لەگەڵ منداڵەكەت بكە ئەوا كەسێكی لاواز و بیرتەسك هەڵدەكەوێت، لەلایەكی دیكەوە منداڵەكە تووشی بێزاری و لاوازیی دەروون دەبێت، ئەمەش بەهۆی ئەوەی بەشێوەیەكی بەردەوام شكاندووتە و لێی تووڕەبوویت و ڕێگە ڕاستەكەت پێشان نەداوە.