یوتیوب بەهۆی ڕاپۆرتێکی ئاڤا 20 چەناڵی کوردیی سووتاو دەگەڕێنێتەوە

ئاڤا نیوز

لە یەک کاتدا 23 چەناڵی یوتیوبەرانی کورد دەسووتێن و بەهۆی ڕاپۆرتێکی ئاڤا میدیاوە 20 چەناڵیان گەڕانەوە.

چیرۆکی سەرەکی: ڕۆژی 2025-09-21، 23 چەناڵی گەورە و دیاری یوتیوبەرانی کورد سووتان، هۆکارەکە سزای کۆپی ڕایت بوو بۆ سەر یوتیوبێک کە پەیوەندیی بەو یوتیوبانەوە نەبووە، تەنیا پێشتر لەسەر سێرڤەرێک لیست کراوە و پارەکانی لە یوتیوب وەرگرتووە.

لێدوانی فەرمی: ڕامان لوقمان عەبدوڵڵا، یوتیوبەری دیاری کورد و خاوەنی چەناڵی "ڕامۆکوردش"، بە ئاڤای وت: دوای ئەوەی ڕاپۆرتی داخستنی چەناڵەکانمان لە ئاڤا میدیا بڵاوکرایەوە، ئێمە توانیمان ڕاپۆرتەکەی ئاڤا بکەینە کەیسێکی بەهێز و پێشکەشی یوتیوبی بکەین، تاوەکو متمانەی زیاتری بە کەیسەکەی ئێمە هەبێت و چەناڵەکانمان بۆ بگەڕێنێتەوە، بەمەش وەڵامی داواکارییەکەمان درایەوە.

لەلایەکی دیکەوە: مەبەست بەهائەددین، یوتیوبەری دیاری کورد کە تەواوی ئەو چەناڵانەی لە یوتیوب لیست کردووە بە ئاڤای ڕاگەیاند: ئێوە کە بە دەنگ و ڕەنگ کێشەکەی ئێمەتان باس کرد، کاریگەرییەکی زۆری بۆ چارەسەرکردنی کێشەکەمان هەبوو، تەنیا دوو چەناڵ ماون بگەڕێنەوە و 48 کاتژمێری داهاتوو ئەوانیش دەگەڕێنەوە.

ئەوەی پێویستە بیزانیت: لەو چەناڵە دیارانەی داخرا بوون، ئێستا تەنیا چەناڵەکانی مستەر شکۆ و هۆزان بی 12 ماون بگەڕێنەوە و کاریان لەسەر دەکرێت.

ژمارەکان وا دەڵێن: ناوی بەشێکی چەناڵە گەڕاوەکان ئەمانەن: ڕامۆ کوردش، ئەکتەر گەیمینگ، مستەر میر، ژیار گەیمەر، شڤار توبی، زانا ئاڵتون، بیلال مەلیک، حەمکۆ، بەهەست بەهائەددین، هاوکار کینگ، بیکەی کلیپ و کورد گەیمەرن.