تا ساڵی داهاتوو زیاتر لە هەزار و 500 بیری ئاو دەکوژێنرێنەوە

ئاڤا نیوز

 

تا ساڵی داهاتوو ژمارەیەک پرۆژەی ئاو تەواو دەکرێن، بەهۆیەوە زیاتر لە هەزار و 500 بیری ئاو دەکوژێنرێنەوە.

 

وێنە گەورەکە: حکومەتی هەرێمی کوردستان کار لەسەر ئەوە دەکات ئاوی خواردنەوە لە رێگەی پرۆژەکانی ئاوی سەرزەوی دابین بکات و کەمترین ئاوی ژێرزەوی بەکار بهێنرێت، بۆ ئەم مەبەستە ژمارەیەک پرۆژەی جێبەجێ کردووە و ژمارەیەکی دیکەش لە باری جێبەجێ کردنن.

 

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای گوت: لە ڕێگەی پێنج هەزار و 800 بیر، 24 پرۆژەی ستراتیژی، 24 پرۆژەی بچووک و نزیکەی 500 کانی ئاوی خواردنەوە بۆ هاونیشتمانیان دابین دەکرێت.

 

-  50%ی ئاوی ژێرزەوی و 50% ئاوی سەرزەوی بەکاردێت بۆ دابینکردنی ئاو بۆ هاونیشتمانیان.

- بە تەواوبوونی ئەو پرۆژانەی کاریان تێدا دەکرێت تا ساڵی داهاتوو هەزار و 500 بۆ هەزار و 600 بیری ئاو دەکوژێنرێنەوە.

- بە تەواوبوونی پرۆژەکان و کوژانەوەی ئەو بیرانە ڕێژەی بەکارهێنانی ئاوی ژێرزەوی بۆ ئاوی خواردنەوە لە 50% کەم دەبێتەوە بۆ 30%، واتا 70%ی ئاوی خواردنەوە لە ئاوی سەرزەویەوە دابین دەکرێت.

 

بابەتە ستراتیژییەکان: حکومەتی هەرێمی کوردستان کار لەسەر ئەوە دەکات ئاوی خواردنەوە 100%ی لە ئاوی سەرزەوی دابین بکرێت و بەهیچ جۆرێک ئاوی ژێرزەوی بەکارنەهێنرێت.

 

خاڵە ئەرێنییەکان: کوژانەوەی بیرەکان کاریگەری راستەوخۆی دەبێت لە پارێزگاری کردن لە ئاستی ئاوی ژێرزەوی.