یەکەمین هەڵبژاردنی پەرلەمانی سووریا لەدوای ئەسەد ئەنجام دەدرێت

ئاڤا نیوز
 
ئەمڕۆ یەکشەممە یەکەمین هەڵبژاردنی پەرلەمانی سووریا لەدوای ڕووخانی دەسەڵاتەکەی ئەسەد بەڕێوەدەچێت، لە هەڵبژاردنەکەدا ناوچەکانی ژێر دەسەڵاتی هەسەدە و پارێزگای سوەیدا لە باشووری وڵاتەکە بەهۆکاری نەگونجاوی دۆخەکە، بێبەشکراون.

وێنە گەورەکە: هەڵبژاردنەکەی ئەمڕۆ بەهۆی خاپووربوونی ژێرخانی سووریا و نەبوونی داتای ڕوون و ژمارەی دەنگدەران، بەشێوەی ناڕاستەوخۆ بەڕێوەدەچێت، واتە لەهەر پارێزگایەک چەند سەد کەسێک لە چین و توێژە جیاوازەکان دیاریکراون و ناویان نراوە دەستەی دەنگدەران، ئەم دەستەیە لە هۆڵێکدا کۆدەبنەوە و دەنگ دەدەن، بەگوێرەی ژمارەی کورسییەکانی هەر پارێزگایەکیش، ئەوانەی زۆرترین دەنگ بەدەستدەهێنن دەبن ئەندامی پەرلەمانی سووریا.

ڕاگەیێنراوی فەرمی: لیژنەی باڵای هەڵبژاردنەکانی سووریا ڕایگەیاند، دەستەی دەنگدەران لەسەرجەم پارێزگاکانی سووریا نزیکەی حەوت هەزار کەسن، بۆ 140 کورسییەکەی پەرلەمانیش کە بە دەنگدان دیاریی دەکرێن، هەزار و 578 کەس خۆیان کاندید کردووە.

ئەمەش بزانە: پەرلەمانی نوێی سووریا لە 210 ئەندام پێکدێت، لەو ژمارەیەش 140 کورسیی بە دەنگدانی دەستەی دەنگدەران دیاریی دەکرێن و 70 پەرلەمانتارەکەی دیکەش لەلایەن سەرۆککۆماری سووریاوە دیاریی دەکرێن.

لەلایەکی دیکەوە: لە هەڵبژاردنەکەی ئەمڕۆدا ناوچەکانی باکوور و ڕۆژهەڵاتی سووریا (پارێزگاکانی حەسەکە، ڕەققە و بەشێکی دێرەزوور) کە لە ژێر دەسەڵاتی هەسەدەن لەگەڵ پارێزگای سوەید لە باشووری سووریا کە درووزەکان بەڕێوەی دەبەن، بەهۆکاری نەگونجاوی دۆخەکە لەڕووی ئەمنیی و لۆجستییەوە، هەڵبژاردنیان تێدا ناکرێت و هەڵبژاردن لەو ناوچانە بۆ کاتێکی دیکە دواخراوە.