فەزڵ شاکر خۆی ڕادەستی لوبنان دەکاتەوە

ئاڤا نیوز

فەزل شاکر، هونەرمەندی لوبنانی کە پێشتر لەگەڵ گرووپی چەکداریی تووندڕەی ئایینی تێوەگلابوو، لە دەروازەی کەمپی عەین ئەلحیلوە خۆی ڕادەستی هەواڵگری سوپای لوبنان کرد.

چیرۆکی سەرەکی: ناوبراو شانبەشانی ئەحمەد ئەسیر، پیاوی ئایینی سەلەفییەکان دژی سوپای لوبنان شەڕیان کردووە لە ناوچەی عیبرا لە شاری سەیدای لوبنان لە ساڵی 2013دا کە بە "ڕووداوەکانی عیبرا" ناسراوە، بەو هۆیەوە چەندین ئەندامی سوپای لوبنان کوژران. دادگای سەربازیی لوبنان لە کۆتاییەکانی ساڵی 2020دا سزای 22 ساڵ زیندانیکردنی بە غیابی بۆ دەرکرد. لە دوای ئەوە فەزڵ شاکر بۆ ئەوەی لە دەستبەسەرکردن ڕزگاری بێت، پەنای بۆ کەمپی عەین ئەلحیلوە برد کە دەکەوێتە شاری سەیدا.

ڕاگەیێنراوی فەرمی: ڕادیۆی دەنگی لوبنان بڵاویکردەوە، فەزڵ شاکر خۆی ڕادەستی حکومەتی لوبنان دەکات ئەمەش بە ویستی خۆی بووە. هێزێکی هەواڵگری سەربازی ڕەوانەی دەروازەی کەمپەکە کرا بۆ ئەوەی بیگوازنەوە بۆ سەربازگەی زغێب لە سەیدا و دواتر دەگوازرێتەوە بۆ بەیرووت.

زانیاریی زیاتر: فەزل شاکر لە ساڵی 2012 بە ڕیشەوە دەرکەوت و وازهێنانی خۆی لە هونەر ڕاگەیاند، دواتر داوای لە هاووڵاتییانی سووریا کرد بەشداربن لە شۆرش و چەک دژی ڕژێمی بەشار ئەسەد هەڵبگرن.

ئەوەی پێویستە بیزانیت: لە ساڵی 2018دا فەزڵ شاکر لە بڕیاری وازهێنان لە گۆرانی وتن پاشگەز بووەوە و چەند گۆرانییەکی لە کەناڵی فەرمی خۆی لە یوتیوب بڵاوکردەوە، هەروەها لە دوو مانگی ڕابردوودا سێ گۆرانیی بڵاوکردووەتەوە کە تەنیا لە کەناڵەکەی یوتیوبی نزیکەی 200 ملیۆن بینەریان هەبووە.

ئەمەش بزانە: کەمپی عەین ئەلحیلوە دەکەوێتە باشووری لوبنان و بە کەمپی ئاوارەکانی فەڵەستین ناسراوە، ئەم کەمپە ساڵی 1948 بۆ لەخۆگرتنی ئاوارە فەڵەستینییەکان دروستکراوە و لەو کاتەشەوە تائێستا ئاسایشی ناوکەمپەکە لەژێر دەستی ڕێکخراو و گرووپە چەکدارەکانی فەڵەستین دایە، حکومەتی لوبنانیش کۆنتڕۆڵی ئەمنیی بەسەر ناوخۆی کەمپەکەدا نییە.