دەستەی گشتیی وەبەرهێنان: نیوەی پڕۆژە ستراتیژییەكانی وەبەرهێنانی كوردستان، لە كابینەی نۆیەمدا كراون

ئاڤا نیوز

سەرۆكی دەستەی گشتیی وەبەرهێنانی هەرێمی كوردستان ڕایدەگەیەنێت، لە 33 ساڵی تەمەنی حكومەتی کوردستاندا، 46%ـی پڕۆژە ستراتیژییەكانی وەبەرهێنان لەماوەی ئەم شەش ساڵەی دوایی کابینەی نۆیەم كراون.

چیرۆكی سەرەكی: لەماوەی شەش ساڵی تەمەنی كابینەی نۆیەمی حكومەتی هەرێمی كوردستاندا، دەستەی گشتیی وەبەرهێنان مۆڵەتی بە 718 پڕۆژەی گەورە و ستراتیژیی وەبەرهێنان داوە، ئەمە لەكاتێكدا لە تێكڕای هەشت كابینەكەی دیكە 840 پڕۆژەی وەبەرهێنان جێبەجێ كراون، بەواتای ئەوەی؛ لە 33 ساڵی تەمەنی حكومەتی کوردستاندا، 46%ـی پڕۆژە ستراتیژییەكانی وەبەرهێنان لەماوەی ئەم شەش ساڵەی دواییدا كراون.

لێدوانی فەرمی: محەممەد شوكری، سەرۆكی دەستەی گشتیی وەبەرهێنانی هەرێمی كوردستان بە ئاڤای ڕاگەیاند، هۆكاری سەرەكیی زیادبوونی پرۆژەكانی وەبەرهێنان لە هەرێمی كوردستان ئەوەیە؛ ئێمە لە دەستەی وەبەرهێنان بە ڕاسپاردەی سەرۆكوەزیران كارئاسانیی زۆر بۆ وەبەرهێنەران و خاوەنكاران دەكەین لەپێناو جێبەجێكردنی پڕۆژەكانیان. ئامانجەكە ئەوەیە وەبەرهێنان بگەیێنرێتە سەرجەم ناوچەكانی هەرێمی كوردستان لە سەرجەم سێكتەرە جۆراوجۆرەكاندا.

ژمارەکان وا دەڵێن: بەگوتەی شوکری، تەنیا لە كابینەی نۆیەمی حكومەتی هەرێمی كوردستان، مۆڵەتیان بە 718 پڕۆژەی گەورە و ستراتیژیی وەبەرهێنان داوە، ئەمە لەكاتێكدا لە تێكڕای هەشت كابینەكەی دیكە 840 پڕۆژەی وەبەرهێنان جێبەجێ كراون، واتە 46%ـی تێكڕای وەبەرهێنان كە لە هەرێمی كوردستاندا كراون، لەماوەی كابینەی نۆیەمی حكومەتی هەرێمی كوردستان بووە.

ئەوەی پێویستە بیزانیت: لەساڵی 2006ـەوە تا ساڵی 2025، 1558 پڕۆژە بە سەرمایەی (76 ملیار و 720 ملیۆن و 739 هەزار دۆلار) جێبەجێ كراون، ئەو (718) پڕۆژەیەی كە لەماوەی كابینەی نۆیەمدا مۆڵەتیان پێدراوە؛ سەرمایەی بەگەڕخراو تێیدا (22 ملیار و 426 ملیۆن و 550 هەزار دۆلار) بووە كە دەكاتە 40%ـی سەرمایەی هەموو وەبەرهێنانی مێژووی هەرێمی كوردستان.