مارکۆ ڕوبیۆ: جێبەجێکردنی قۆناغی دووەمی پلانی غەززە ئاسان نابێت

ئاڤا نیوز

وەزیری دەرەوەی ئەمریکا قۆناغی دووەمی پلانی غەززە بە قۆناغێکی قورس ناودەبات و ڕایدەگەیەنێت قۆناغی یەکەم لەم هەفتەیەدا جێبەجێ دەکرێت.

وێنە گەورەکە: کۆبوونەوەکانی قاهیرە لە نێوان ئەمریکا و ئیسرائیل و حەماس، بڕیاردەری جێبەجێکردنی پلانەکەی دۆناڵد ترەمپ، سەرۆکی ئەمریکا دەبن بۆ کۆتاییهێنان بە جەنگ لە غەززە، بڕیاروایە سبەی دووشەممە کۆبوونەوەیەکی گرنگ لەسەر قۆناغی یەکەمی پلانەکە بەڕێوەبچێت و تاوتوێی ئازادکردنی بارمتەکان بکرێت.

لێدوانی فەرمی: مارکۆ ڕوبیۆ، وەزیری دەرەوەی ئەمریکا لە لێدوانێکی ڕۆژنامەوانیدا ڕایگەیاند، کۆبوونەوەکانی قاهیرە زۆر گرنگن و چارەنووسی ئەم قۆناغە دیاری دەکەن، کۆبوونەوەکانی ئەم هەفتەیە سەبارەت بە قۆناغی یەکەم دەبن و چاوەڕوان دەکەین لە نزیکترین کاتدا سەرجەم بارمتەکان ئازاد بکرێن و بابەتەکە تەنیا لەسەر کۆمەڵێک ڕێکاری سەرەتایی ماوە، بە زووترین کات قۆناغی یەکەمی پلانەکە جێبەجێ دەکرێت.

زانیاریی زیاتر: مارکۆ ڕوبیۆ لە درێژەی قسەکانیدا گوتی، هەرچەندە حەماس بە شێوەیەکی بنەڕەتی ڕەزامەندی لەسەر پلانەکە دەربڕیووە، بەڵام قۆناغی دووەمی پلانەکە کە بریتی دەبێت لە کۆکردنەوەی چەکەکان و کشانەوەی سوپای ئیسرائیل، قۆناغێکی ئاسان نابێت، دواتر دروستکردنی ئیدارەی بەڕێوەبردنی غەززەش قۆناغێکی ئاڵۆز و گرنگ دەبێت و چاوەڕوانی ڕۆژانی داهاوتووین بۆ ئەوەی ببینین حەماس تا چەند بە گرنگیەوە لە پرۆسەکە دەڕوانێت و پابەندی جێبەجێکردنی هەموو قۆناغەکانی پلانەکە دەبێت یان نا.