مەسرور بارزانی لەبارەی مووچە و داهاتی نانەوتی نامەیەک ئاراستەی سوودانی دەکات

ئاڤا نیوز

سەرۆكی دیوانی ئەنجوومەنی وەزیرانی هەرێمی كوردستان ڕایگەیاند، سەرۆكوەزیران مەسرور بارزانی نامەیەكی بۆ سەرۆكوەزیرانی عێراق ناردووە و داوای كردووە، وەڵامی ئەنجوومەنی دەوڵەت نەكرێتە بنەما لەبارەی دیاریكردنی بڕی داهاتی نانەوتی.

وێنە گەورەکە: دوای ڕێککەوتنی نێوان هەولێر و بەغدا و هەناردەکردنەوەی نەوتی کوردستان، یەکێک لە لەمپەرەکانی بەردەم خەرجکردنی مووچە چارەسەرکرا، بۆ ڕێککەوتن لەسەر ناردنی داهاتی نانەوتی کوردستان، هەردوولا چاوەڕێی یەکلاییکردنەوەی بڕەکەن لەلایەن ئەنجوومەنی دەوڵەت.

لێدوانی فەرمی: ئومێد سەباح، سەرۆكی دیوانی ئەنجوومەنی وەزیرانی هەرێمی كوردستان لە كۆنفرانسێكی ڕۆژنامەوانیدا ڕایگەیاند، بۆ زامنكردنی مووچەی مووچەخۆرانی هەرێمی كوردستان و لەپێناو ئەوەی هیچ مووچەیەك نەفەوتێت، هەمیشە ئامادەییمان دەربڕیوە كە لەنزیكترین كاتدا پشكی فیدراڵی لە داهاتی نانەوتیی هەرێمی كوردستان بۆ بەغدا بنێردرێت هەر كاتێك ڕێكارەكانی ناردنی مووچەی مانگەكانی هەشت و نۆ دەستپێبكات، ڕەوانەی دەکەین، بەڵام تاكو ئێستا حكومەتی فیدراڵ ڕەزامەندی لەسەر ناردنی مووچەی مانگەكانی هەشت و نۆ نەداوە.

سەرۆكی دیوانی ئەنجوومەنی وەزیران ئاماژەی بەوەشكرد، هەرچەندە ڕێككەوتن لەسەر بڕی ئەو پارەیە كراوە كە وەك داهاتی نانەوتی سێ مانگی هەرێمی كوردستان بۆ خەزێنەی فیدراڵی ڕەوانە دەكرێت، بەڵام بۆچوونی ئەنجوومەنی دەوڵەت لەبارەی دیاریكردنی پشكی خەزێنەی فیدراڵی لە داهاتە ناوخۆییەكانی كوردستان، گرفتێكی دیكەی بەردەم پرۆسەكەیە.

زانیاریی زیاتر: د. ئومێد سەباح دووپاتیكردەوە، بۆچوونی ئەنجوومەنی دەوڵەت لەو پرسە، پابەندكارانە نییە، بۆ ئەوەش سەرۆكوەزیران مەسرور بارزانی نامەیەكی بۆ سوودانی، سەرۆكوەزیرانی عێراق ناردووە و داوای كردووە، وەڵامی ئەنجوومەنی دەوڵەت لەبارەی پرسی داهاتە ناوخۆییەكان نەكرێتە بنەما بۆ ناردنی مووچەی مووچەخۆرانی هەرێمی كوردستان.