د. حەمدی شنگالی: دەکرێت کوردستان ببێتە ناوەندێکی ستراتیژی بۆ فرۆشتی نەوت و دەروازەی گەیشتن بە ئەوروپا

ئاڤا نیوز

نەوتی هەرێمی کوردستان گەیشتووەتە بازاڕەکانی جیهان و جێگری بەڕێوەبەری سۆمۆ دەڵێت: دەکرێت هەرێمی کوردستان ببێتە ناوەندێکی ستراتیژیی فرۆشتنی نەوت و گەیشتن بە ئەوروپا.

چیرۆکی سەرەکی: د. حەمدی شنگالی، جێگری بەڕێوەبەری سۆمۆ، کۆمپانیای بەبازاڕکردنی نەوتی عێراق لە گفتوگۆیەکی تایبەتدا لەگەڵ ئاڤا میدیا، باسی پرسی ڕێککەوتننامەی سێقۆڵی و هەناردەکردنەوەی نەوتی کوردستان، پرسی یاسای نەوت و غازی عێراق دەکات. 

لێدوانی فەرمی: د. حەمدی شنگالی، جێگری بەڕێوەبەری سۆمۆ بە ئاڤای ڕاگەیاند: هەرێمی کوردستان هاوسنوورە لەگەڵ تورکیا, بەمەش عێراق دەتوانێت سوودی زۆری لێ وەربگرێت، کوردستان بکاتە ناوەندێکی ستراتیژی و گرنگی فرۆشتی نەوت و ڕێگای گەیشتن بە وڵاتانی ئەوروپا، چونکە بۆ عێراق باشترە ڕێگایەکی دیکەی فرۆشتنی نەوتی هەبێت جگە لە بەسرە. 

زانیاریی زیاتر: بە گوتەی د. حەمدی شنگالی، پڕۆژەکانی سەرۆکوەزیران مەسرور بارزانی لە هەرێمی کوردستان پڕۆژەی بونیادی و کاریگەرن، بۆیە با عێراق ڕێککەوتنی هەناردەکردنەوەی نەوتی کوردستان بکاتە هاندەرێک بۆ ئەوەی پڕۆژەی دیکەی گەورەی نەوت جێبەجێ بکرێن و ببەسترێنەوە بە ئەوروپا.

ئەوەی پێویستە بیزانیت: لەبارەی ئەوەی ڕێککەوتنی نەوت دەتوانێت ڕێگە بۆ دانانی یاسای نەوت و غازی عێراق خۆش بکات، د. حەمدی شنگالی دەڵێت: ڕێککەوتنی باش و گرنگ ڕێگەخۆشکەر دەبێت بۆ بابەتی دیکە، کوردستان بۆ دانانی یاسای نەوت و غاز زۆر هەماهەنگە، ئەگەر یاساکە بەگوێرەی دەستووری عێراق دابنرێت زۆر کێشە و گرفت چارەسەر دەکات، چونکە دەستوور ڕوون و ئاشکرایە، هەموو بەرپرسیارێتی و مافێک تێیدا دەستنیشان کراوە، بۆیە ئەگەر شتەکان وەک ئێستا بڕۆن، ئەوا دەگەینە ڕێککەوتنێکی باشتر.